İkardidən imza almaq üçün 433 manatından keçən MƏŞHUR SİMA

"Qalatasaray"ın "Qarabağ"la qardaşlıq oyunu üçün Bakıya səfəri zamanı dünya ulduzu Mauro İkardi hər kəsin diqqət mərkəzində idi.

Onunla əl sıxıb görüşmək, şəkil çəkdirmək, imza almaq istəyənlərin sayı onminlərlə olsa da, heç də hər kəs arzusuna çatmadı.

Lakin kreativ addım atanlar da olub.

Vaxtilə ölkəmizdə legioner həyatı yaşamış, futbolçu karyerasını başa vurandan sonra Bakıda qalaraq blogerlik fəaliyyəti ilə məşğul olan Nuqzar Kvirtiya kimi.

Sabiq "10 nömrə" İkardidən imza almaq üçün "Fairmont"da bir günlük otaq kirayələyib və bu, ona 433 manata başa gəlib.

Maraqlı fakt haqda tanınmış bloger oyunla bağlı hazırladığı 10 dəqiqəlik vlogda məlumat verib:

"Qalatasaray" Bakıya gələn gün mən də "Fairmont"a gəldim və burada problemlə qarşılaşdım.

Komanda gələnə qədər lobbidə oturmağa icazə vermədilər və bildirdilər ki, otelin müştərisi olmadığıma görə buranı təcili tərk etməliyəm. İşin mahiyyəti ilə bağlı məlumat versəm də, prinsipə getdilər.

Mən də məcburən prinsipə gedib, oteldə otaq nömrəsi aldım. Əcnəbi vətəndaş olduğum üçün otaq mənə 433 manata başa gəldi. Yerlilər üçünsə qiymət 270 manat təşkil edir. Nə isə, bunları reklam etmək istəmirəm.

İkardinin imzalı forması mənə 433 manata başa gəldi. Bu formanı qalib izləyicilərimdən birinə hədiyyə edəcəm".

Əslən Gürcüstandan olan Nuqzar Kvirtiya 2009-2012, 2015-2018-ci illər aralığında AZAL-ın, 2012/13 mövsümündə "Turan"ın formasını geyinib. O, Azərbaycan Premyer Liqasında 200-dən çox oyunun iştirakçısı olub.

Sportinfo.az

Telegramda izləyin