"Azərbaycan-Türkiyə arasındakı uzun illər müxtəlif sınaqlardan üzüağ çıxan qardaşlıq bu gün dünyaya nümunədir" - DEPUTAT

"Bu gün hər bir azərbaycanlı Türkiyədə keçirilən prezident seçkisini diqqətlə izləyir".

Bunu Sonxeber.az-a danışan deputat İqbal Məmmədov bildirib.

Deputat qeyd edib ki, mayın 14-də baş tutan seçkilərdə prezidentliyə namizədlərdən heç biri 50%-dən çox səs toplamadığı üçün səsvermənin ikinci turu mayın 28-də keçiriləcək:

"Seçkilərin nəticələrindən asılı olmayaraq, Türkiyə və Azərbaycan strateji tərəfdaş olmaqla yanaşı həm də qardaş ölkələrdir. Bu gün vətəndaşlarımızın çoxu Rəcəb Tayyib Ərdoğanın yenidən prezident seçilməsi arzulayır. Çünki Rəcəb Tayyib Ərdoğan 20 il ərzində ölkəsi üçün böyük işlər görən liderdir. Hərbi-sursat istehsal edən ölkələrdən biri də Türkiyədir. Bu gün "Bayraktar TB2"lər dünya aviasiya və müdafiə sənayesi tərəfindən maraqla izlənilir və Ukrayna, Qətər, Azərbaycan Polşa da daxil olmaqla 23 ölkə ilə ixrac müqavilələri imzalanıb. Tək hərbi deyil digər sahələrin inkişafında da Rəcəb Tayyib Ərdoğan böyük işlər görüb. Ümumiyyətlə düşünürəm ki, Rəcəb Tayyib Ərdoğana səs verməklər Türkiyə xalqı ən doğru seçimini edəcək".

Deputat vurğulayıb ki, Türkiyə və Azərbaycanın münasibətləri möhkəm təməllərə malikdir:

"44 günlük Vətən müharibəsində və ondan sonrakı dövrlər atılan addımlar bir daha sübut etdi ki, bir millət iki dövlət olan Azərbaycanla-Türkiyə daim bir-birinin yanındadır. Eləcə də Türkiyədə fevralın 6-da baş verən dəhşətli zəlzələ zamanı qardaş ölkənin səsinə ilk səs verən ölkə məhz Azərbaycan oldu.

Azərbaycan-Türkiyə arasındakı uzun illər müxtəlif sınaqlardan üzüağ çıxan qardaşlıq bu gün dünyaya nümunədir. Müstəqilliyimizi bərpa etdikdən sonra qardaş Türkiyə ilə bütün sahələrdə əlaqələrimiz yüksələn xətt üzrə inkişaf etməkdədir. Əminliklə deyə bilərəm ki, dostluq və qarşılıqlı etimad əsasında qurulan Azərbaycan-Türkiyə əlaqələri bundan sonra da möhkəmlənəcək".

Aysel Yusifqızı

Telegramda izləyin