Asiya və Avropa arasında yeni nəqliyyat dəhlizi layihəsi təqdim edildi

İraq hakimiyyəti şənbə günü bu Yaxın Şərq ölkəsinin neftlə zəngin cənub bölgələrini Türkiyənin Aralıq dənizi sahilləri ilə birləşdirəcək və ticarəti böyük ölçüdə asanlaşdıracaq dəmir yolları və avtomobil yollarını özündə birləşdirən nəqliyyat və logistika sistemi – "İnkişaf Yolu" layihəsinin başlandığını elan edib.

Layihənin təqdimatı Bəhreyn, İordaniya, İran, Qətər, Küveyt, Birləşmiş Ərəb Əmirlikləri, Oman, Səudiyyə Ərəbistanı, Suriya və Türkiyə nümayəndə heyətlərinin iştirakı ilə Bağdadda açılan konfransda baş tutub.

"İnkişaf yolu" bütün İraq iqtisadiyyatını canlandırmaq üçün güclü stimul və İraqla qonşu dövlətlər üçün perspektivli imkandır", - İraqın baş naziri Məhəmməd əl-Sudani forumun açılışında deyib.

Onun sözlərinə görə, layihə İraqda "region ölkələrinə müasir sənaye məhsullarının ixracatçısına çevrilməyə imkan verəcək" nəqliyyat və logistika qovşağının yaradılmasına yönəlib.

Planlara əsasən, əsas nəqliyyat marşrutları Fars körfəzi sahillərində yerləşən böyük Fao limanına bağlanacaq. "İnkişaf Yolu" çərçivəsində İraqı qonşu dövlətlərlə birləşdirəcək yüksək sürətli avtomobil yolları ilə birləşdirilən 1200 km-dən çox dəmir yolu modernləşdirilərək tikiləcək. Layihənin dəyəri təqribən 17 milyard dollar qiymətləndirilir. Respublika rəsmiləri sərmayələrin əhəmiyyətli hissəsinin ərəb ölkələrindən, xüsusən də Fars körfəzi monarxiyalarından daxil olacağını güman edirlər.

İraq hökumətinin nümayəndəsinin sözlərinə görə, layihənin praktiki icrasına başlanılması gələn ilin əvvəlinə planlaşdırılır. Planlaşdırılan göstəricilər yerinə yetirilərsə, "İnkişaf Yolu" 2029-cu ildə başa çatdırıla bilər.

Təhlilçilər əmindirlər ki, layihə faktiki istismar mərhələsinə qədəm qoyduqda yüklərin Asiyadan Avropaya və əks tərəfə çatdırılma müddətini əhəmiyyətli dərəcədə azaldacaq, eyni zamanda hələ də əsas nəqliyyat dəhlizi olan Misirin Süveyş kanalı ilə ciddi rəqabət apara biləcək.

Telegramda izləyin