Tramp: Dövlət hesabına yayımlanan reklamları siyasi fond ödəyəcək

ABŞ Prezidenti Donald Tramp vergi ödəyicilərinin vəsaiti hesabına yayımlanan və onun siyasətini təbliğ edən televiziya reklamları ilə bağlı qərarını dəyişib.
Bizimyol.info xəbər verir ki, Trampın sosial media hesabında yazdığına görə, bundan sonra bu cür reklamların xərclərini onun siyasi Siyasi Fəaliyyət Komitəsi (Political Action Committee - PAC) olan "MAGA Inc." qarşılayacaq.

Söhbət federal büdcədən ən azı 1,5 milyon dollar xərclənən reklam kampaniyasından gedir. Reklamlarda Trampın siyasəti və prezidentlik fəaliyyəti təbliğ olunub. Bu isə həm demokratların, həm də bəzi respublikaçıların tənqidinə səbəb olub.

Tramp reklamları müdafiə edərək onları ABŞ-ın uğurlarını təbliğ edən "müsbət reklamlar" adlandırıb. O bildirib ki, gələcək reklamların xərcləri "MAGA Inc."nin topladığı siyasi vəsait hesabına ödəniləcək.

Məlumata görə, "MAGA Inc." iyulun sonuna qədər 400 milyon dollardan çox vəsait toplayıb. Təşkilat qarşıdakı aralıq seçkiləri ərəfəsində respublikaçı namizədlərə maliyyə dəstəyi də göstərir.

Ağ Ev Trampın açıqlamasını təsdiqləyərək gələcək reklamların MAGA Inc. tərəfindən maliyyələşdiriləcəyini bildirib. Bununla belə, indiyədək dövlət büdcəsindən artıq xərclənmiş vəsaitin geri qaytarılıb-qaytarılmayacağı ilə bağlı açıqlama verilməyib.

Hüquq ekspertləri isə dövlət vəsaitinin Trampı təbliğ edən reklamlara yönəldilməsinin federal qanunvericiliyi poza biləcəyini bildiriblər.

Telegramda izləyin