"İran və ABŞ qeyri-rəsmi danışıqlar aparır" - İranlı deputat

İranlı deputat Fədahüseyn Maliki Tehranla Vaşinqton arasında qeyri-rəsmi danışıqların aparıldığını və dolayısı ilə aparılan danışıqların bəzilərində nəticəyə gəlindiyini bildirib.

Sonxeber.az xəbər verir ki, Parlamentin Milli Təhlükəsizlik və Xarici Siyasət Komissiyasının üzvü Maliki İran dövlət televiziyasına bağlı Gənc Jurnalistlər Klubuna müsahibəsində İran və ABŞ arasında müxtəlif mövzularda dolayı və birbaşa danışıqların aparıldığını deyib.

"Amerikalılarla vasitəçilər vasitəsilə aparılan danışıqların bəziləri uğurlu oldu. Bizim ABŞ ilə də birbaşa danışıqlarımız var, lakin bu danışıqlar rəsmi deyillər",- deyə Maliki bildirib.

İranın BMT-dəki daimi nümayəndəsi Səid İrəvani ilə Ağ Evin İran üzrə xüsusi nümayəndəsi Robert Mallinin ABŞ-da bir neçə dəfə görüşməsi və danışıqlarda mühüm irəliləyişin əldə olunması ilə bağlı iddialar son vaxtlar beynəlxalq mediada yer alıb. İran mediası isə Omanda İran və ABŞ arasında dolayı danışıqlar aparıldığını açıqlayıb.

Ötən gün İran Xarici İşlər Nazirliyinin sözçüsü Nasir Kənani ABŞ-la dolayı danışıqlar apardıqlarını təsdiqləyib.

Telegramda izləyin