"Azərbaycan və Ermənistan sülhə münasibətdə bərabər addımlayırlar"- Qabil Hüseynli

Ermənistanın Baş naziri Nikol Paşinyan Ermənistan Respublikası Qarabağ əhalisinin taleyini həll edə bilməz və bu il Azərbaycan-Ermənistan sülh müqaviləsi imzalana bilər.

Mövzu ilə bağlı Sonxeber.az-a danışan politoloq Qabil Hüseynli bildirib ki, Paşinyanın mövqeyi səmimi idi. Sadəcə narahat edici məqam Rusiyanın mövqeyidir. Rusiya separatçıları dəstəkləyir:

"Zənnnimcə, sülh üçün böyük imkanlar var. Həm Azərbaycan, həm Ermənistan tərəfi sülh müqaviləsinin imzalanması üçün konstruktiv kökləniblər. Ermənistanda müəyyən məqamlarda destruktivlik özünü biruzə versə də, bütövlükdə sülhə münasibətdə bərabər addımlayırlar. Dünən Paşinyan kecirdiyi mətbuat konfransında həm sülh müqaviləsi, həm Ermənistan-Azərbaycan münasibətləri, xüsusilə, Azərbaycanın ərazi bütövlüyü məsələsində yanaşmanı ortaya qoydu. Zənnimcə, onun qoyduğu mövqe səmimi idi. Xüsusilə Qarabağdakı separatçı qüvvələri tənqid etməsi, onların Azərbaycanla inteqrasiya prosesinə keçməsi məsələsi diqqət çəkici idi. Sadəcə bir məqam narahat edir. Avropa Birliyi vasitəçiliyi ilə Brüssel prosesi gedir. Digər yandan da bölgədə hakim olduğunu göstərmək üçün Rusiya paralel sülh yaratma prosesinə qoşulub. Rusiyanın mövqeyi xüsusilə Qarabağ ermənilərinin statusu ilə məsələyə yanaşmaları Azərbaycan üçün əlverişli deyil. Azərbaycanın ərazi bütövlüyü, suverenliyinə hörmətsizlikdir. Amma bütün bunlara baxmayaraq, sülh yaratma prosesinə nikbin yanaşmaq mümkündür və zənnimcə, bu ilin sonlarına doğru sülh müqaviləsi imzalana bilər".

Politoloq həmçinin qeyd edib ki,dünyada heç kim separatçıları dəstəkləmir:

"Dünya erməniləri separatçılıqda müdafiə etmir. Heç Ermənistan belə müdafiə etmir. Bir neçə aventürist, separatçı var ki, erməni kütləsindən təcrid edəcəyik və tədricən bölgədə öz suverenliyimizi qoruyacağıq".

Şəbnəm Lətifi

Telegramda izləyin