Suraxanıda antiterror tədbirlərində şəhid olanların 40 mərasimi keçirilib - Fotolar

Azərbaycan Silahlı Qüvvələri tərəfindən Qarabağ iqtisadi rayonunda keçirilən lokal xarakterli antiterror tədbirləri zamanı şəhid olmuş ordumuzun hərbi qulluqçularının 40 mərasimləri Suraxanı rayonunda qeyd olunub.

Sonxeber.az "Qafqazinfo"ya istinadən xəbər verir ki, oktyabrın 25-də Ağayev Rüfət Xanəhməd oğlunun, oktyabrın 28-də Qafarov Savalan İsfəndiyar oğlunun, oktyabrın 30-da isə Nəcəfi Elxan Şükür oğlunun 40 mərasimləri keçirilib.

Bu münasibətlə Suraxanı Rayon İcra Hakimiyyətinin başçısı Əziz Əzizov, Milli Məclisin deputatları, YAP Suraxanı Rayon Təşkilatının sədri, rayonun hüquq-mühafizə orqanlarının, idarə, müəssisə və təşkilat rəhbərləri, RİHB-nin müavinləri, şəhid ailələri və qazilər tərəfindən şəhidlərin məzarları ziyarət olunub.

Vətənimizin ərazi bütövlüyü uğrunda canından keçmiş bütün şəhidlərimizin xatirəsi yad edilib, ruhlarına dualar oxunub, ehsan süfrələri açılıb.

Tədbirlərdə çıxış edən RİH başçısı Əziz Əzizov Vətən naminə canını fəda edən, torpaqlarımızın ərazi bütövlüyü yolunda öz qanı ilə adlarını Şəhidlik zirvəsinə yazan, müqəddəs amal uğrunda şəhid olmaqla əbədiyyətə qovuşan igid oğullarımıza Allahdan rəhmət, ailələrinə səbr diləyib.

Əziz Əzizov bildirib ki, Ali Baş Komandan cənab İlham Əliyevin rəhbərliyi ilə mənfur düşmənə ağır zərbə vuran, layiqli dərs verən, adlarını qəhrəmanlıq salnaməsinə yazmaqla Vətənin bölünməzliyinə imza atan Şəhidlərimizin adını uca tutmaq, əbədiləşdirmək, onların doğmalarına, ailə üzvlərinə təskinlik verərək diqqət və qayğı göstərmək hər birimizin vətəndaşlıq borcumuz, ən ümdə vəzifəmizdir. Hər biri bir qəhrəmanlıq dastanı olan Şəhidlərimizlə qürur duyur, onların ruhunu ehtiramla yad edirik.

Telegramda izləyin