Ölkədə boşanmaların sayı niyə artır? - AÇIQLAMA

Dünyanın hər yerində boşanmalar günü-gündən artır. Ailə strukturları da dəyişir. İndi boşanmış cütlüklərin uşaqları, yeni həyat yoldaşları və onların uşaqları kimi birlikdə yaxud növbə ilə yaşadığı ailə modelləri var. Ona görə də bu artımlar və dəyişikliklər tezliklə bitməyəcək. Bu məsələyə geniş perspektivdən yanaşmaq vacibdir. Statistikalara görə, 1 ayda boşananların sayında 1762 artım olub. Bu baxımdan boşanmaların artımı nə ilə bağlıdır?

Mövzu ilə bağlı sosioloq Mahir Yaqub Sonxeber.az-a açıqlama verib. Onun sözlərinə görə, boşanmalar dayanmadan artır və müxtəlif səbəbləri mövcuddur:

"Amma o səbəblərdən biri kişilərin ailələrində xanımlarına qarşı fiziki və psixoloji güc tətbiq etməsi və valideynlərin gənc ailələrin işinə yersiz müdaxilə etməsidir. Üçüncü amil kişinin yaxud xanımın xəyanətidir. Dördüncü amil isə kişinin evə baxmaması və xanımın bundan bezib boşanmaq istəməsidir. Bunların hamısı mövcuddur. Amma məncə, Azərbaycanda və bütün dünyada ailə institutunun dağılmasının əsas səbəbi ifrat və biabırçı vəziyyətdə sosial şəbəkələrdə, mətbuatda və televiziyada, virtual məkanlarda ailə institutunun əleyhinə, ziddinə geniş vüsət almış təbliğatdır".

Sosioloq bildirib ki, müasir dünyada dayanmadan növlərini çoxaldan əyləncə modelləri və onları yaradan insanlar, sistemlər ailə institutunun əleyhinədir:

" Hər tərəfdə, o cümlədən əfsuslar olsun ki, Azərbaycan televiziya məkanlarında yayımlanan verilişlərin səviyyəsizliyi var. Bu verilişlərə baxan, qadın və kişi də ailəyə sevgi arta bilərmi? Qətiyyən. Əgər bir xanım normal ailəsi varsa. Müşahidə edirsə ki, gündə yeni bir müğənni xanım ortaya çıxır. Müstəqil həyat yaşayır və istədiyi qədər pul qazanır. Hansı yollar ilə qazanır özü bilir. Belə bir xanımda ailəyə bağlılıq hissi yarana bilər? Ona görə statistika göstərir ki, bu dəqiqə boşanmaya müraciət edənlərin çoxu xanımlardır. Mən inanmıram ki, təkcə fiziki və psixoloji şiddətdən boşanmağa can atırlar. Xeyir. Belə bir düşüncə var ki, xanımlar müstəqil həyat yaşayacaqlar. Bunun cəmiyyətdə nümunələrini görürlər. Əfsuslar olsun ki, bu tendensiyada mövcuddur və ciddi amillərdən biridir".

Sevda Səfərova

Telegramda izləyin