Hansı məhbuslar əfv üçün müraciət edə bilər? - CAVAB

Hər il əfv sərəncamları verilən ərəfələrdə əfv olunmaq üçün nə qədər məhbus müraciət edir. Bəs hansı məhbuslar əfv üçün müraciət edə bilər?

Məsələ ilə bağlı vəkil Turan Abdullazadə Sonxeber.az-a açıqlama verib.

Vəkil məsələyə aydınlıq gətirib:

"Qanunvericiliyə əsasən, əfv edilmək üçün Azərbaycan Respublikasının Prezidentinə bilavasitə və ya qanuni nümayəndələrinin vasitəsilə müraciət etmək bütün növ məhkumların hüququdur.
Məhkumlar cəza çəkməkdən aşağıdakı əsaslarla azad edilirlər:
1) cəza müddəti qurtardıqda;
2)hökmün ləğv edilməsi ilə əlaqədar işin icraatına xitam verildikdə;
3) cəzadan şərti olaraq vaxtından əvvəl azad edildikdə;
4) cəzanın çəkilməmiş hissəsi daha yüngül cəza növü ilə əvəz edildikdə;
5) amnistiya və ya əfvetmə aktına əsasən;
6) xəstəliyə və qanunvericiliklə nəzərdə tutulmuş digər əsaslara görə.

Azərbaycan Respublikası Cinayət Məcəlləsinin 82-ci maddəsinə əsasən, əfvetmə fərdi qaydada müəyyən edilmiş şəxs barəsində Azərbaycan Respublikasının Prezidenti tərəfindən həyata keçirilir.

Cinayət törətməyə görə məhkum olunmuş şəxs əfvetmə aktı ilə cəzanın qalan hissəsini çəkməkdən azad edilə bilər, yaxud ona təyin olunmuş cəzanın müddəti azaldıla bilər və ya belə şəxsin cəzasının çəkilməmiş hissəsi daha yüngül cəza növü ilə əvəz edilə bilər. Ömürlük azadlıqdan məhrum etmə cəzası əfv qaydasında iyirmi beş ildən çox olmayan müddətə azadlıqdan məhrum etmə cəzası ilə əvəz edilə bilər. Əfvetmə aktı ilə cəzasını çəkmiş şəxsin məhkumluğu götürülə bilər.

Cəzaların İcrası Məcəlləsinə əsasən, cəzaçəkmə müəssisəsinin müdiriyyəti tərəfindən də məhkumların razılığı ilə onların əfv edilməsi haqqında vəsatət qaldırıla bilər".

Telegramda izləyin