Azərbaycan müvafiq inzibati ərazilərə BÖLÜNƏ BİLƏR - AÇIQLAMA

Azərbaycanda keçirilən prezident seçkilərindən sonra idarəetmə sahəsində bir sıra dəyişikliklər həyata keçirildi. İlk olaraq bələdiyyələrin sayının azaldıması və birləşdirilməsi ilə bağlı qanun layihəsi hazırlandı. Eyni zamanda Qarabağda bir sıra ərazilərə prezidentin xüsusi nümayəndəsi təyin edildi. Bu məqamda icra hakimiyyətlərinin taleyi sual yaradır. Bundan sonrakı mərhələdə idarəetmə sahələrində hansı dəyişikliklər gözlənilir?

Mövzu ilə bağlı politoloq Turab Rzayev Sonxeber.az-a açıqlamasında artıq Azərbaycanda inzibati islahatların vaxtı gəlib çatıb. Uzun müddətdir icra hakimiyyəti sistemi effektiv idarəetmə kimi öz nəticəsini ortaya qoymur. Hətta bununla bağlı ilkin addımlar atılıb. Regional təhsil və mədəniyyət idarələrin yaradılıb:

"Faktiki olaraq mədəniyyət və təhsil kimi bir sıra sahə icra hakimiyyətlərinin əlindən alınıb, regional idarəetmələrə tapşırılıb. Hətta Qarabağ işğaldan azad ediləndən sonra yeni bir idarəetmə forması sınaqdan keçirildi. Prezidentin xüsusi nümayəndəlikləri yaradıldı. Artıq bunun regional şəkildə əsası qoyuldu. Bu regional idarəetmələr maliyyə, təhsil, mədəniyyət kimi bir sıra sahələrdə söz sahibinə çevrildilər. Növbəti islahatlar Naxçıvanda oldu. Naxçıvanda bütün hüquqlar prezidentin xüsusi səlahiyyətli nümayəndəliyinə keçdi. Daha az səlahiyyətə məxsus olan sahələr isə ali məclis sədrinin sərəncamında qaldı. Bundan sonra, uğurlu idarəetmə metodu sınaq keçirilərək bütün ölkəyə tətbiq olunacaq".

Politoloqun sözlərinə görə, ölkənin iqtisadi zonalara bölünməsi və bu şəkildə idarə edilməsi daha uyğundur:

"Bütün Azərbaycan ərazisi 14-15 yaxud fərqli sayda inzibati ərazilərə bölünə bilər. Digər tərəfdən iqtisadi ərazi bölgüləri üzrə fərqli bir idarəetmə təsis edilə bilər. Burada prezidentin səlahiyyətli nümayəndələri həmin zonaların rəhbərləri kimi təyin olunacaqlar. Birbaşa prezidentin bölgələrdəki səlahiyyətlərini icra başçıları yox, onun nümayəndələri həyata keçirəcək. Bundan sonra, bələdiyyələr ilə bağlı ciddi narazılıqlar var. Yəqinki bələdiyyə idarəetməsi sahəsində ciddi islahatlar aparılacaq. Prezidentin səlahiyyətli nümayəndələri Türkiyədəki kimi "vali"lik sistemini öz üzərinə götürəcəklər. Yerli özünüidarəetmə orqanları olaraq bələdiyyələrin səlahiyyətləri formalaşdırıla bilər. Bununla yanaşı, mövcud bələdiyyələrin statusu dəyişdirilə bilər. İndiki icra hakimiyyətləri bələdiyyələrin səlahiyyətlərini mənimsəyiblər. Bələdiyyələr isə daha çox lokal məhəllə xarakterli məsələlərdə müstəqil qərarlar verməli olacaqlar".

Xatırladaq ki, prezident İlham Əliyev Azərbaycan Respublikası Prezidentinin xüsusi nümayəndəsi təyin edilməsi haqqında Sərəncam imzalayıb. Sərəncama əsasən, Emin Zamin oğlu Hüseynov Ağdam, Füzuli və Xocavənd rayonlarında, Elçin Mustafa oğlu Yusubov Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi təyin edilib.

Sevda Səfərova

Telegramda izləyin