"Avropa Parlamentinin qətnaməsi əsassız və qərəzlidir" - DEPUTAT

"Avropa Parlamentinin 13 mart 2024-cü il tarixli qətnaməsi ölkəmizə qarşı yönəlmiş növbəti təxribatdır".

Bunu Sonxeber.az-a danışan deputat İqbal Məmmədov bildirib.

Deputat qeyd edib ki, Avropa Parlamentinin qəbul etdiyi "Avropa İttifaqı və Ermənistan arasında daha yaxın əlaqələr və Azərbaycanla Ermənistan arasında sülh sazişinə ehtiyac" adlı qətnaməsi əsassız və qərəzlidir:

"Dünən Avropa Parlamentinin qəbul etdiyi bu qətnamə ölkəmizə qarşı yürüdülən növbəti ikili standartların bariz nümunəsidir. Erməni lobbisinin təsiri altında olan bir sıra dairələr tərəfindən hazırlanan bu qətnamə, "sülhün təşviq edilməsi" kimi təqdim olunsa da bu addım açıq-aşkar Azərbaycana qarşı başladılan qarayaxma kampaniyasının tərkib hissəsidir. Bu qətnamədə bütün faktlar saxtalaşdırılaraq beynəlxalq əlaqələrin mahiyyətinə zidd olaraq siyasi etik normalardan kənar cəfəng və təhqiramiz ifadələr yer alır. Ən önəmlisi isə bu sənəddə Azərbaycanın ərazi bütövlüyü və suverenliyinə qarşı açıq pozuntu dolu fikirlərin əks olunması bir daha Avropa Parlamenti üzvlərinin əsl simasını ortaya qoyur".

Deputat vurğulayıb ki, bu gün bəzi qüvvələr Azərbaycan-Ermənistan münasibətlərinin normallaşmasına maneə olmağa çalışır:

"Eləcə də Avropa Parlamenti. Yaxşı olardı ki, Avropa Parlamenti Azərbaycan-Ermənistan münasibətlərini yenidən gərginləşdirmək əvəzinə bütün dünyanı bürüyən daha ciddi problemlərin həlli üçün çalışsın. Bu gün qəbul olunan heç bir qətnamə bizi yolumuzdan döndərə bilməz".

Telegramda izləyin