Lui Bono Azərbaycana gəlir: Gözləntilər NƏLƏRDİR? - AÇIQLAMA

Xəbər verdiyimiz kimi, Ermənistan xarici işlər naziri Ararat Mirzoyan ABŞ Dövlət Departamentinin Qafqaz danışıqları üzrə baş müşaviri Lui Bono ilə görüşüb. Ermənistandan sonra ABŞ-nin Qafqaz danışıqları üzrə baş müşaviri Lui Bono Azərbaycana səfər edəcək. Səfər ilə bağlı hansı gözləntilər var?

Mövzu ilə bağlı politoloq Tural İsmayılov Sonxeber.az-a açıqlamasında bildirib ki, Lui Bono ABŞ-nin Qafqaz danışıqları üzrə xüsusi nümayəndəsidir. Cənubi Qafqaz regionu ilə öz fəaliyyəti, mandat ve prizması baxımından maraqlanır:
"Ona görə də tez-tez Lui Bononun bölgəyə səfərləri reallaşır. Onun səfərləri bu baxımdan başa düşüləndir. Eyni zamandan hesab edirəm ki, ABŞ Azərbaycan-Ermənistan münasibətlərinin reallaşması ilə bağlı daha aktiv və fəal bir mövqe tuta bilər. Əfsuslar olsun ki, bu günə qədər ABŞ tərəfindən belə bir mövqe tutulduğuna şahidlik etməmişik. Adətən işğalçı və işğala məruz qalana eyni gözdən yanaşılıb. ABŞ-nin müxtəlif rəsmilərinin bölgə və Azərbaycan-Ermənistan münasibətləri ilə bağlı mövqelərində həmişə yanlışlıqlar olub. Hər zaman qeyri-obyektivliklərə rast gəlmişik. Ona görə də, bütövlükdə dünyada özünü önəmli siyasi qüvvə hesab edən Amerika Birləşmiş Ştatlarından daha aydın mövqe gözləmək haqqımız var. Lui Bononun səfəri Azərbaycan-Ermənistan münasibətlərinin gələcək prinsipləri müzakirə etmək baxımından və əgər ABŞ bundan sonra prosesdə müsbət və obyektiv ala biləcəksə, irəli sürəcəyi şərtləri bilməyimiz baxımından əhəmiyyətlidir. Hesab edirəm ki, Lui Bononun bölgəyə səfərinin hansısa kordinal, köklü dəyişikliklərə səbəb olacağına gözləməkdə yersizdir".

Qeyd edək ki, İrəvanda keçirilən görüşdə tərəflər Cənubi Qafqazda təhlükəsizlik məsələlərini, eyni zamanda, Ermənistan-Azərbaycan normallaşma prosesini müzakirə edib.

Telegramda izləyin