Paşinyan istefa verərsə Azərbaycan-Ermənistan müharibəsi yenidən başlaya BİLƏRMİ? - DEPUTAT

Xəbər verdiyimiz kimi Ermənistan mətbuatında Nikol Paşinyanın istefa verəcəyini və sentyabrda növbədənkənar parlament seçkilərinin keçiriləcəyini yazıb. Daha sonra Ermənistan mətbuatında Nikol Paşinyanın istefası ilə bağlı çıxan yazıların 1 aprel – Gülüş günü ilə əlaqədar "zarafat" olduğu üzə çıxıb.Bu gün hər kəsi maraqlandıran suallardan biri də Nikol Paşinyan istefa verərsə və yenidən Baş nazir seçilməsə sülh prosesi necə davam edəcək?

Bununla bağlı Sonxeber.az-a danışan deputat Cavanşir Paşazadə bildirib ki, Nikol Paşinyanın istefa verməsi ilə bağlı xəbərlərin yayınması və daha sonra yayılan məlumatların 1 aprel – Gülüş günü ilə əlaqədar "zarafat" olduğu deyilməsi bu ölkənin qeyri-ciddi olmasının, erməni cəmiyyətinin baş nazirinə nifrətinin sübutudur.

"Ümumiyyətlə Paşinyanın hakimiyyətdən getməsi sülh müqaviləsinin imzalanma müddətinin artmasına gətirib çıxara bilər. Paşinyanın yerinə başqa adamlar seçilsə də Azərbaycanın diqtəsi ilə hazırlanan sülh müqaviləsi gec-tez imzalanacaq. Paşinyanın yerinə başqasının hakimiyyətə gəlməsi bizim üçün sadəcə vaxt itkisidir və sülh müqaviləsinin imzlanması müddətini uzada bilər. Ümid edirəm ki, növbəti aylarda sülh müqaviləsinin imzalanması istiqamətində əhəmiyyətli irələyiş əldə ediləcək. Bu gün bizim üçün önəmli olan məsələlərdən biri də Qazaxın 7 kəndini və Kərkinin bizə geri qaytarılmasıdır. Azərbaycanın bu məsələdə heç bir güzəştə getməyəcək".

Deputat qeyd edib ki, bu gün Ermənistan və ona havadarlıq edən bəzi qərb dövlətləri yaxşı anlayır ki, Azərbaycanla diqtə dilində danışmaq olmaz:

"Hakimiyyət dəyişsə belə Ermənistan üçtərəfli bəyanatın şərtlərini əməl etməlidir. İlk olaraq Azərbaycanın kəndləri qaytarılmalı, Zəngəzur dəhlizi açılmalı və Qərbi Azərbaycanlıların doğma yurdlarına geri qayıdıb Ermənistan vətəndaşı kimi yaşaması təmin edilməlidir. Hakimiyyətə kimin gəlməsindən asılı olmayaraq üçtərəfli bəyanatın bu şərtləri qeyd-şərtsiz əməl edilməlidir. Qaldı ki, Paşinyanın hakimiyyətdən getməsinin yenidən mühribənin başlanmasına səbəb olma ehtimalına, müharibə Azərbaycanın qələbəsi ilə başa çatıb. İnanmıram ki, Ermənistan biabırçı məğlubiyyətindən sonra Azərbaycanla yenidən müharibəyə başlasın. Çünki bu dəfə başlanılacaq müharibə Ermənistanın ölkə kimi xəritədən silinməsinə gətirib çıxaracaq".

Telegramda izləyin