"Sülh müqaviləsindən imtina Ermənistanın ölkə kimi varlığını şübhə altına sala bilər" - DEPUTAT

"Son günlər Ermənistan silahlı qüvvələrinin bölmələrinin Azərbaycan Ordusunun müxtəlif istiqamətlərdə yerləşən bölmələri atəşə tutması bir daha bu ölkənin necə terrorçu ölkə olduğunu sübut edir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, aprelin 5-də Brüsseldə ABŞ Dövlət katibi Antoni Blinken, Avropa Komissiyasının sədri Ursula fon der Lyayen və Ermənistanın baş naziri Nikol Paşinyanın görüşü oldu:

"Bu görüşdən sonra Ermənistanın regionda vəziyyəti gərginləşdirmək cəhdləri daha artıb. Bilirsiniz ki, bu qısamüddətli görüşdən sonra Aİ Ermənistana 292, ABŞ isə 65 milyon dollar məbləğində vəsait verəcəyini açıqladı. Bu gün Ermənistanı silahlandıran ölkələr iqtisadi-humanitar yardım adı altında açıq-aşkar terrorçu dövlətə maliyyə ayıraraq regionda yenidən müharibəni alovlandırmağa çalışırlar. Aİ və ABŞ-ın birdən-birə Ermənistana niyə bu qədər vəsait ayırsın?Ayırdıqları vəsait həqiqətənmi iqtisadi-humanitar yardım məqsədi daşıyır? Bir dəfə də olsa 30 il ərzində işğal etdiyi torpaqlarımızı azad etməsi üçün Ermənistana təzyiq göstərməyən qüvvələrin bu ölkəyə hümanitar yardım üçün maliyyə ayırması inandırıcı deyil. Məncə ayrılan pullar Ermənistanın silahlandırılmasına xərclənəcək. Məqsəd də Cənubi Qafqazda düşünülmüş, məqsədyönlü və planlı şəkildə gərginlik yaratmaqdır".

Deputat vurğulayıb ki, hazırda bəzi ölkələr 44 günlük Vətən müharibəsində Ermənistanın itirdiklərini geri qazandırmağa çalşır:

"Amma Azərbaycan nə Ermənistana, nə də havadarlarına regionda yenidən gərginliyi artırmağa icazə verməyəcək. Yaxşı olar ki, Ermənistan 44 günlük vətən müharibəsindəki və antiterror əməliyyatlarındakı biabırçı məğlubiyyətlərini unutmasın. Avropadan yardım dillənmək Ermənistanı sülh müqaviləsini imzalamaqdan canını qurtarmayacaq. Sülh müqaviləsindən imtina Ermənistanın ölkə kimi varlığını şübhə altına sala bilər. Ermənistan təxribatlarına davam edərsə "dəmir yumruğu" yenidən başında hiss edəcək".

Qeyd edək ki, aprelin 5-də Brüsseldə ABŞ Dövlət katibi Antoni Blinken, Avropa Komissiyasının sədri Ursula fon der Lyayen və Ermənistanın baş naziri Nikol Paşinyanın görüşü olub. Qısamüddətli görüşdən sonra Aİ Ermənistana 292, ABŞ isə 65 milyon dollar məbləğində vəsait verəcəyini açıqladı.

Telegramda izləyin