İlham Əliyev Putinlə görüşəcək: Qazaxın kəndləri və Kərkinin taleyi HƏLL OLUNUR? - ŞƏRH

Xəbər verdiyimiz kimi, Ermənistan öz silahlı qüvvələrini Azərbaycanın Bağanıs-Ayrum, Xeyrımlı, Aşağı Əskipara və Qızılqacılı kəndlərindən çıxarır. Eyni zamanda bu gün dövlət başçısı İlham Əliyev Rusiya lideri Vladimir Putinlə görüşəcək. Bəs bu görüşdə Qazaxın 3 kəndi və Kərkiin qaytarılması ilə bağlı müzakirələr aparıla bilər?

Mövzu ilə bağlı Sonxeber.az-a danışan politoloq Turan Rzayev deyib ki, Qazaxın 3 kəndi və Kərki Azərbaycan və Ermənistan arasında münaqişəli məsələdir. Yəni müzakirəsi iki ölkə arasında rəsmi və qeyri-rəsmi danışıqlardan asılıdır:

"Bundan əvvəl Qazaxın qeyri-anklav olan kəndlərinin bizə qaytarılması sərhəd komissiyalarının görüşü ilə baş verdi. Bənzər formada görüşlər ilə bu məsələ həllini tapa bilər. Yerdə qalan kəndlərin qaytarılmasını hansı metodla olacağı hələ də müəyyən edilməyib. Amma bütün hallarda 4 kəndin qaytarılması iki ölkə arasında gedən danışıqlar prosesinə müsbət təsir göstərəcək. Prosesin bundan sonrakı mərhələsi üçün diplomatik "domino" effekti yaradacaq".

Politoloqun sözlərinə görə, dövlət başçısının Rusiya səfəri zamanı regional məsələlərin, xüsusilə Qazaxın və Kərkinin qaytarılması məsələsinin müzakirəsi mümkündür. Aydın məsələdir ki, Rusiya regional gücdür:

"Regionda gedən proseslərdə Azərbaycan tərəfi hər zaman rəsmi Moskvanın maraqlarını nəzərə alıb. Bizi qələbəyə gətirən və nəticədə diplomatik mənada güllə belə atılmadan kəndlərin qaytarılmasını əsaslandıran başlıca səbəb rəsmi Bakının və Rusiya arasında balans siyasətini yetirməsidir. Azərbaycan balans siyasətini Rusiya ilə davam etdirir. Biz bu məsələlər ilə bağlı Rusiyanı məlumatlandıracağıq. Regional ölkə olaraq göstərmiş olacağıq ki, Rusiyanıda nəzərə alırıq. Başlıca müzakirə mövzuları qeyd olunan məsələlər ola bilər. Bundan əlavə müzakirəyə ehtiyac olacaq məsələlər var. Hərbi və siyasi diplomatik sahədə müzakirələr mövcuddur".

Xatırladaq ki, Azərbaycan dövlət sərhədinin delimitasiyası üzrə Dövlət Komissiyasının və Ermənistanın dövlət sərhədinin delimitasiyası və sərhəd təhlükəsizliyi Komissiyasının səkkizinci görüşü keçirilib. Görüşdə Qazaxın işğal altında olan yeddi kəndindən dördünün Azərbaycana qaytarılması haqqında razılıq əldə edilib.

Sevda Səfərova

Telegramda izləyin