Yalnız qız övladları olan valideynlər 55 yaşında pensiyaya çıxa bilərmi? - AÇIQLAMA

Bildiyimiz kimi, kişilərə münasibətdə qadın vəfat etdiyi və uşağın kişinin himayəsində olduğu və növbəti ailə qurduğu halda da kişilərin tələb olunan şərtlər daxilində 5 il erkən pensiya hüququ tanınacaq. Bu "Əmək pensiyaları haqqında" qanuna dəyişiklik layihəsində əksini tapıb. Lakin belə bir problem var ki, yalnız qız övladı olan valideynlər müəyyən yaşa çatdıqdan sonra ya işləyə bilmir, ya da pensiya yaşına çatmadan vəfat edir. Əlbəttə ki, ailədə qız övladı müəyyən bir vaxta qədər işləyir və valideynlərinə qayğı göstərir. Lakin qız övladı ailə qurduqdan sonra bu vəziyyət dəyişə bilir. Belə olan halda, yalnız qız övladları olan valideynlər 55 yaşında pensiyaya çıxa bilər?

Mövzu ilə bağlı Sonxeber.az-a danışan sosioloq Üzeyir Şəfiyev deyib ki, bu yaxınlarda həyat yoldaşını itirən kişilərin erkən pensiyaya çıxması ilə bağlı məsələlərə baxıldı. Həyat yoldaşını itirmiş və övladları azyaşlı olan kişilər ikinci dəfə ailə qursalar belə onların 5 il erkən pensiyaya çıxmaq hüququ tanınır:

"Ana vəfat etdikdən sonra, atanın uşaqlar ilə sosiallaşmasında, qayğısından qalmaqda rolu var. Bu baxımdan dövlət sosial dəstək proqramları və müxtəlif sosial layihələr ilə belə insanlara güzəşt edir. Burada isə mövzu oğul övladları olmayan və qız övladı olan ataların erkən yaşda pensiyaya çıxmasıdır. Azərbaycanda tənha ahıllar üçün sosial dəstək layihələri var. Tənha ahıllara ilə bağlı həm Əmək və Əhalinin Sosial Müdafiəsi Nazirliyi, həm də Sosial Xidmətlər Agentliyinin həyata keçirdiyi layihələr var. Digər institusional səviyyədə tənha ahıllara dəstək layihələri həyata keçirilir. Onların övladları yoxdursa, diqqət qayğı ehtiyacları olarsa, bu zaman həmin qəbildən olan şəxslər üçün sosial xidmət müəssisələridə var".

Sosioloqun sözlərinə görə, Azərbaycanda uzun müddət ənənəvi cəmiyyət olduğuna görə, yaşlı valideynlərə övladları qayğı göstərir. Bu olmadıqda bu vəzifəni dövlət özü edir. Azərbaycanda artıq belə bir institut var ki, ahıl insanın övladı yoxdursa yaxud uzaqda yaşayırsa, onlar dövlət qayğısı ilə təmin olunur. Hətta həmin şəxslərə sosial xidmətçi tutulur və onlara qayğı göstərirlər:

"Azərbaycanda bu tip sosial xidmətçi institutu var. Yəni ahıllar dövlət səviyyəsində bu qayğı ilə təmin olunur. Ancaq onların erkən pensiyaya çıxması ilə bağlı kifayət qədər yanaşmalar var. Həm qadınlara, həm də kişilərin daxil olduğu fərqli kateqoriyaya daxil olan əhali qrupu var. Onlarin erkən pensiyaya çıxması ilə bağlı yanaşma mövcuddur və həyata keçirilir. Amma hazırda sözügedən məsələ hələki müzakirə mövzusu deyil. Ümumiyyətlə belə bir analogiyanı aparmaq olduqca çətindir. Ölkələrdə bu qəbildən olan insanların erkən pensiyaya çıxma məsələsi araşdırılmalıdır. Düşünürəm ki, bu hələki müzakirə mövzusu deyil. Güman etmirəm ki, yaxınlarda bu məsələ müzakirə mövzusu olsun. Çünki bizim cəmiyyətimiz ənənəvidir. Ahıl valideynlərə övlad baxır. Övlad olmayanda isə yaxınlar bu vəzifəni yerinə yetirir. Əgər heç kim baxa bilmirsə, bu zaman onlara qayğı dövlət sosial xidmət müəssisələri üzərindən həyata keçirilir. O cümlədən sosial layihəsi ilə onlara dəstək göstərilir".

Sevda Səfərova

Telegramda izləyin