1 gündə 40 zəhərlənmə: Azərbaycanda dönərxanalar BAĞLANIR? - AÇIQLAMA

Xəbər verdiyimiz kimi, ötən gün günün ikinci yarısından başlayaraq gecə saatlarına kimi Zaqatala Rayon Mərkəzi Xəstəxanasına müxtəlif yaş qruplarına aid 40 nəfərə yaxın insan toyuq dönərindən zəhərlənməsi faktı əsasında müraciət edib. Zaqatalada əksər dönərxanaların fəaliyyəti dayandırılıb. Buna səbəb ötən gün 40 nəfərə yaxın sakinin toyuq dönərindən zəhərlənməsi göstərilir. Bəs Azərbaycanda kütləvi zəhərlənmə hadisəsindən sonra açıq şəraitdə hazırlanan dönərxanalar bağlana bilər?

Mövzu ilə bağlı Sonxeber.az-a danışan Azad İstehlakçılar İctimai Birliyinin sədri Eyyub Hüseynov deyib ki, Azərbaycanda qida zəhərlənmələri illər boyu gizlədilir. Bu hələ AQTA yaranmamışdan əvvəl başlayıb və bu qurumun zamanında da davam edir:

"AQTA-nın saytına baxsaq, görərik ki, qida zəhərlənmələrinə görə Azərbaycan dünyanın ən xoşbəxt xalqıdır və az zəhərlənmə var. Bütün bunlara baxmayaraq, orta insan ömrü uzunluğunda Azərbaycan 190 ölkə arasında 119-cu yerdədir. Yəni Azərbaycan 119 ölkədən geri qalır. Afrikanın, Asiyanın bir sıra geridə qalmış ölkələrindən, o cümlədən Banqladeş və Filippindən, Şri-Lankadan uzunömürlülüyə görə Azərbaycan onlardan geri qalır. Bu o deməkdir ki, bizim qidalarımız heç də təhlükəsiz deyil. AQTA yarananda biz sevinirdik və düşünürdük ki, bu məsələlər həll olunacaq. Amma biz yenə də apteklərdə növbəyə duran istehlakçılara çevrilmişik. Dönərxanalarda problemlər yaşanır. Mən iki il AQTA-da İctimai Şuranın üzvü oldum. Daim məsələ qaldırdım ki, dönərxanalarda vəziyyəti düzəltmək lazımdır. Bəzən mənim ictimai çıxışlarım AQTA-nın ironiyasına səbəb olur. Yüksək tribunalarda səsləndirilir ki, bəzi ekspertlər deyir ki, dönərin xarici tərəfi qovrulur və içəri tərəfinə heyvan ətində olan baytarlıq dərmanının qalıqlarını və xəstəlikləri yarada bilən amilləri sinidə qatıb insanlara verirlər. Bunlar ironiya ilə böyük məclislərdə təqdim olunur".

Eyyub Hüseynovun sözlərinə görə, dönərxanalarda problemlər var və xüsusilə quş əti ilə hazırlanan dönərlərdə bu hal daha çox var. Buradakı məsələ tək ət ilə deyil. Məsələ həm də buraya qatılan mayonez və digər inqredientlərdir:

"Mayonezlər açıldıqdan sonra saxlanma müddəti 8 saatdan artıq deyil. Mayonezlər oraya açıq şəkildə gətirilir və necə hazırlandığı bilinmir. Eyni zamanda bu mayonezlər isti şəraitdə saxlanılmamalıdır. Eləcə də bu gündən sabaha qalan dönərlərin problemi yaşanır. Yəni dönərlər elə bir məhsuldur ki, onu bu gündən axşama kimi qurtarmasan, hansı şəraitdə saxlayırsan saxla mütləq çirklənəcəkdir. Elə bir nəzarət sistemi qurulmalıdır ki, bu gündən sabaha saxlanılan dönərlər ya saxlanmasın, ya da istifadə olunmasın. AQTA-nın mühüm çatışmayan işlərindən biri odur ki, mallar üçün elə bir sənəd yoxdur ki, biz istehlakçılar deyək ki, o sənəd olanda arxayın olaq. Yəni qida mallarında sertifikat anlayışı yoxdur. Sadəcə olaraq istehsalçı müəssisələrdə AQTA-ya kiçik məbləği keçirir, reyestrə daxil edir və guya orada nəzarət işi aparır".

Ekspert bildirib ki, ciddi çatışmayan məsələlərdən biri, qanunlarda olan boşluqdur. AQTA-nın səlahiyyəti yoxdur ki, istənilən yerə cəld müdaxilə edə bilsin:

"Mütləq AQTA-nın əsasnaməsində dəyişiklik və cəld reaksiya mexanizmi olmalıdır. Bürokratik yoxlama mexanizmi mövcuddur. Üç gün öncə deyilsin, sonra Ədliyyə Nazirliyinə xəbər verilsin və s. Belə olan halda zəhərlənmələr əlbəttə çox olacaqdır. Bu davam edəcəkdir. Biz uzunömürlülər siyahısında daha da aşağı düşəcəyik. Zaqatalada baş verən hadisədə mənbə xammaldan gəlir. Hardansa bu dönərxalar eyni yerdən mal götürür və bu böyük ehtimalla quş ətidir, orada ciddi çirklənmə baş veribdir. Ona görə AQTA ciddi araşdırma aparmalıdır. Qida zəhərlənmələrinin statistikası düzgün aparılmır. Bu işlərə son qoyulmalıdır. Mükəmməl istehlakçı siyasəti olmalıdır".

Sevda Səfərova

Telegramda izləyin