Bələdiyyələr öz işini GÖRƏ BİLMİR: Niyə LƏĞV OLUNMUR?

Bu gün Azərbaycanda bələdiyyələr ilə bağlı vətəndaşlar tərəfindən ciddi narazılıqlar var. Belə yerli özünüidarəetmə orqanı kimi özünü doğrultmadı. Rayon bələdiyyələri hətta vətəndaşların problemlərini belə həll etmir yaxud maraqlanmır. Bu yaxınlarda bələdiyyələrin sayının endirilməsi ilə bağlı xəbərlər yayıldı. Digər tərəfdən isə Azərbaycanda bələdiyyələrin ləğv edilməsi hələ də gündəmdə olaraq qalır. Çünki bu qurum tam olaraq özünü doğrultmadı və icra hakimiyyətlərinin sözlərinə əməl edən bir quruma çevrildi. Bu baxımdan bələdiyyə islahatları və strukturunun dəyişdirilməsi uzunmüddətdir gündəmdədir. Amma burada məsələ təkcə bələdiyyələrin ləğv edilməsindən yaxud artan şikayətlərdən getmir. Bələdiyyələr ilə bağlı daha böyük problemlər var.

İlk olaraq, bələdiyyələrin verdiyi sənədlərin tanınmamasıdır. Azərbaycan Respublikasının Konstitusiyasına görə, üç mülkiyyət növündən biri dövlət və özəl mülkiyyət ilə yanaşı, həm də bələdiyyə mülkiyyətidir. Ancaq Azərbaycanda bələdiyyənin verdiyi çıxarışlar demək olar ki, heç yerdə qəbul edilmir. Bələdiyyə mülkiyyətini heç rəsmi dövlət orqanlarının özləri qəbul etmir. Bələdiyyə sənədləri ilə bağlı fərqli torpaq zəbtləri iddiaları var. Bələdiyyə torpaqlarının onlara aid olmaması faktları belə mövcuddur. Bələdiyyələr hətta vətəndaşa satdığı torpaqlara sənəd verə bilmirlər. Bunlar gələcəkdə vətəndaşlar arasında problemlərə səbəb olur.

Bu gün Azərbaycanda 500 mindən artıq sənədsiz var. Bunun başlıca səbəbi isə həmin evlərin bələdiyyə torpaqlarında tikilməsidir. Bələdiyyə öz üzərinə düşən işi görmür. Kənd bələdiyyələrində bu qurumlar ilə bağlı kifayət qədər problemlər var. Söhbət burada Bakı rayon bələdiyyələrindən getmir. Ölkənin rayon və kəndlərində bələdiyyələr su problemini həll etmir. Vətəndaş bələdiyyəyə müraciət edir ki, su problemi həll edilsin. Amma bu qurum nəinki problemi həll etmək, hətta vətəndaşa cavab verməyi belə özlərinə çox görürlər. Şəhərdəki köhnə tikililərdə, istismar müddətini bitirmiş yaşayış binalarında hələdə "jek" deyilən qurumlar var. Yeni tikililərdə isə komendant deyilən idarəetmə forması təşəkkül tapıb. Ancaq bunları bələdiyyə idarə etməlidir.

Hələ bu azmış kimi bəzi yerlərdə həm bələdiyyə, həm də "jek" qalıb. Hər ikisi isə vergi yığmağa çalışır. Qurumun fəaliyyətini dərindən araşdırsaq, bu cür problemlər çoxdur. Bələdiyyələrdə mütləq yenidənqurma işləri görülməlidir. Burada bələdiyyənin tamamilə ləğvindən söhbət getmir. Artıq bir sıra ekspertlər təklif edir ki, Azərbaycanda icra hakimiyyətləri ləğv olunsun, yerinə prezidentin xüsusi nümayəndəlikləri yaradılsın. Eyni zamanda bələdiyyələr prezidentin xüsusi nümayəndəliklərinin tabeliyinə verilə bilər. Yəni ləğv edilərək onun strukturuna birləşdirilə bilər. Digər tərəfdən bələdiyyələrə daha çox səlahiyyət verilib Türkiyə modeli kimi, öz büdcəsi və seçkiləri olan instituta çevrilə bilər.

Sevda Səfərova

Telegramda izləyin