Xala, dayı və bibi uşaqları arasında olan evliliklər QADAĞAN OLUNUR? - AÇIQLAMA

Milli Məclisin deputatı Tamam Cəfərova qohum evliliyinə qadağa qoyulması ilə bağlı fikirlər səsləndirib. Deputat bildirilib ki, qohum evlilikləri ilə bağlı hansısa formada qanunvericiliyə müəyyən şərtlər daxilində icazə və ya müxtəlif hallarda məhdudlaşdırılma kimi dəyişikliklər edilə bilər. Bəs ikinci dərəcəli - xala, dayı və bibi uşaqları arasında olan evlilikləri qadağan edilə yaxud bununla bağlı bir qanun layihəsi hazırlana bilər?

Mövzu ilə bağlı Sonxeber.az-a danışan hüquqşünas Şamil Paşayevin sözlərinə görə, qanunvericiliklə xalaoğlu, bibiqızı və qohum evliliyi qanunla qadağa edilsə belə, həmin şəxslərin birgə yaşamasına, aralarında cinsi əlaqə olmasına və uşaq dünyaya gətirməyi qadağa qoyula bilməz:

"Nikahı qadağan etməsələr də bu əlaqəni və ya vətəndaş nikahını qadağan etmir. Belə olanda nikahsız ailələr çoxala bilər. Şəxslər ailə kimi yaşayacaq sadəcə rəsmi nikaha daxil olmayacaqlar. Onların uşaq dünyaya gətirməsi, valideynlik hüququnun verilməsi qanunla qadağan edilə bilmir. Əgər düşüncədə, şüurda dəyişiklik etməsək bu qadağalar mənasızdır. İnsanlar onsuz da alternativ yollar seçə biləcəklər. Hətta saxta övladlığa vermələr belə arta bilər. Yəni şəxslər bir-birinə kağız üzərində xalaoğlu yaxud xalaqızı kimi düşməsin deyə bu addımı atırlar. Sadəcə olaraq evli olan zaman doğulan uşaqlardaki tibbi və fiziki çatışmazlıqlar, xəstə olma ehtimalı kimi digər fəsadları qabartmaqla düşüncəni dəyişmək olar. Düşüncə dəyişməsə qanunu bu formada dəyişmək effektiv olmayacaq".

Telegramda izləyin