"Azərbaycanla İran beynəlxalq və regional təhlükəsizliklə bağlı məsələlərdə eyni mövqedədir" - DEPUTAT

Xəbər verdiyimiz kimi Azərbaycanın Baş naziri Əli Əsədovun rəhbərlik etdiyi nümayəndə heyəti dəhşətli helikopter qəzası nəticəsində faciəvi şəkildə dünyalarını dəyişmiş İran İslam Respublikasının mərhum Prezidenti Seyid İbrahim Rəisi, xarici işlər naziri Hüseyn Əmir Abdullahiyan və onları müşayiət edən başqa yüksək vəzifəli şəxslərin rəsmi vida mərasimində iştirak edib. Qeyd edək ki, Azərbaycan nümayəndə heyətinə xarici işlər naziri Ceyhun Bayramov, həmçinin Milli Məclisin Azərbaycan-İran parlamentlərarası əlaqələr üzrə işçi qrupunun üzvləri Əziz Ələkbərov, Cavanşir Paşazadə, Cəbi Quliyev və digər rəsmi şəxslər daxildir.

Bununla bağlı Sonxeber.az-a danışan deputat Cavanşir Paşazadə ildirib ki, İran İslam Respublikasının Prezidenti Seyid İbrahim Rəisinin, xarici işlər naziri Hüseyn Əmir-Abdullahianın və digər müşayiət edən şəxslərin helikopter qəzasında faciəli surətdə həlak olması dost ölkə olaraq bizi də sarsıtdı:

"Cənab baş naziri Əli Əsədovun rəhbərlik etdiyi nümayəndə heyəti dəhşətli helikopter qəzası nəticəsində faciəvi şəkildə dünyalarını dəyişmiş İran İslam Respublikasının mərhum Prezidenti Seyid İbrahim Rəisi, xarici işlər naziri Hüseyn Əmir Abdullahiyan və onları müşayiət edən başqa yüksək vəzifəli şəxslərin rəsmi vida mərasimində iştirak etdi. Milli Məclisin Azərbaycan-İran parlamentlərarası əlaqələr üzrə işçi qrupunun üzv kimi mən də vida mərasimində iştirak edirdim.

Bir müddət davam edən Azərbaycanla-İran arasındakı gərginlik demək olar ki, aradan qalxıb. Mayın 19-da Azərbaycan Respublikası ilə İran İslam Respublikasının dövlət sərhədində Azərbaycan Respublikasının Prezidenti İlham Əliyevin İran İslam Respublikasının Prezidenti Seyid İbrahim Rəisi ilə görüşü bunu bir daha sübut etdi. Bu gün iki ölkə arasındakı problemlər aradan qaldırılıb. Yaxın zamanlarda Tehranda yeni bir ərazidə səfirliyimizin yenidən fəaliyyətə başlaması gözlənilir".

Deputat qeyd edib ki, bu gün Azərbaycan-İran arasında demək olar ki, hər bir sahədə sıx əməkdaşlıq var:

"Araz çayı üzərində inşa edilmiş "Xudafərin" hidroqovşağının istismara verilməsi və "Qız Qalası" hidroqovşağının açılışı hər iki ölkə üçün olduqca önəmlidir. Bu kimi vacib layihələr Azərbayca-İran arasındakı dostluğu daha da artıracaq. Azərbaycanla İran beynəlxalq və regional təhlükəsizlik ilə bağlı məsələlərdə eyni mövqedə dayanır. Bu gün bütün beynəlxalq təşkilatlarda hər iki ölkə bir-birini dəstəkləyir. Əminəm ki, bu dəstək bundan sonra da davam edəcək".

Telegramda izləyin