Zaqatalada 40 nəfərin zəhərlənməsi ilə bağlı analizlərin nəticələri AÇIQLANDI

Azərbaycan Respublikasının Qida Təhlükəsizliyi Agentliyi 7 may 2024-cü il tarixində Zaqatala rayonunda baş verən zəhərlənmə hadisəsi ilə bağlı laborator analizlərin yekun nəticəsini açıqlayıb.

Qida Təhlükəsizliyi Agentliyindən bildirilib ki, Agentliyə müraciət daxil olduqdan dərhal sonra əməkdaşlar tərəfindən qida məhsulunun istehsal olunduğu iaşə müəssisəsində müayinələrin aparılması üçün məhsullardan, alət və qida ilə təmasda olan səthlərdən nümunələr götürülərək Azərbaycan Qida Təhlükəsizliyi İnstitutunun müvafiq laboratoriyasına təqdim olunub.

Laboratoriyanın yekun sınaq protokoluna əsasən, müayinəsi aparılan bişmiş toyuq əti dönəri, qida ilə təmasda olan alət və səthlərin yaxma nümunələrində ("Staphylococcus aureus", "Clostridium perfringens", "B.cereus" və "E.coli") bakteriyalar aşkarlanıb.

Bununla da hadisənin sanitar-gigiyenik rejimin pozulması nəticəsində məhsulların ikincili bakterial çirklənməsi səbəbindən baş verdiyi təsdiqlənib.

Qeyd edək ki, hadisə zamanı 40 nəfərə yaxın rayon sakini zəhərlənmə diaqnozu ilə xəstəxanalara aparılmışdı.

Telegramda izləyin