"Cənab prezident İlham Əliyevin imzaladığı əfv sərəncamları ölkəmizdə insan hüquq və azadlıqlarına verilən dəyərin sübutudur" - DEPUTAT

Xəbər verdiyimiz kimi prezident İlham Əliyev "Məhkum edilmiş bir sıra şəxslərin əfv olunması haqqında" sərəncam imzalayıb.

Bununla bağlı Sonxeber.az-a danışan deputat Cavanşir Paşazadə bildirib ki, hər il olduğu kimi bu il də cənab prezident İlham Əliyev 28 May - Müstəqillik Günü münasibəti ilə əfv sərəncamı imzaladı:

"Cənab prezidentin imzaladığı əfv sərəncamı 154 nəfərə şamil edilib. 154 soydaşımız bayramı, öz evində, doğmaları ilə qeyd edəcək. Cənab prezidentin imzaladığı hər əfv sərəncamı cənab prezidentin İlham Əliyevin vətəndaşlarımıza göstərdiyi diqqət və qayğının göstəricisidir. Bu gün dövlət siyasətimizin əsas istiqamətlərindən biri insan hüquq və azadlıqlarının hərtərəfli təmin edilməsidir. Bu sahədə ölkəmizdə mütəmadi olaraq islahatlar həyata keçirilir".

Deputat qeyd edib ki, mayın 25-də imzalanan sərənam müstəqillik dövründə imzalanan 70-ci əfv sərəncamıdır:

"Ümumillikdə isə müstəqillik dövründə 70 əfv sərəncamı və 12 amnistiya aktı imzalanıb. Cənab prezidentin İlham Əliyevin humanist addımları nəticəsində minlərlə vətəndaşımız azadlığa qovuşub. Cənab prezident İlham Əliyevin imzaladığı əfv sərəncamları ölkəmizdə insan hüquq və azadlıqlarına verilən dəyərin sübutudur".

Bilirsiniz ki, ötən il ulu öndər Heydər Əliyevin 100 illik yubileyi münasibətilə müstəqil Azərbaycan tarixində ən böyük əfv sərəncamı imzalanmışdı. Həmin sərəncamla 801 məhkum əfv olunmuş, onlardan 463 şəxs azadlıqdan məhrum etmə cəzasından, 220 şəxs azadlıqdan məhrum etmə cəzasının çəkilməmiş hissəsinin yarısından, 118 nəfər azadlıqdan məhrum etmə ilə bağlı olmayan digər cəzalardan (azadlığın məhdudlaşdırılması, islah işləri, cərimə cəzaları və cəzaya şərti məhkum edilmiş şəxslər) azad edilib. Bu il isə imzalanan əfv sərəncamə 154 nəfərə şamil edildi. Ümid edirəm ki, əfv olunan soydaşlarımız dövlət başçımızın onlara göstərdiyi yüksək etimadı doğruldacaq və keçmişdə buraxdıqları səhvləri təkrarlamayacaqlar".

Telegramda izləyin