Məktəblərdə "fond pulu" adı ilə yığılan pullar HARA XƏRCLƏNİR? - AÇIQLAMA

Xəbər verdiyimiz kimi, 46 nömrəli məktəbdə "fond pulu" ilə bağlı məsələ böyüyür. Məlumatda bildirilir ki, "fond pulu" verməyən şagirdlərə qarşı ayrı-seçkilik var. "Fond pulu"nun sinifin təmiri üçün yığıldığı bildirilir. Sinif rəhbəri valideynlərin olduğu "WhatsApp" qrupuna pulu verən şagirdlərin siyahısını göndərib və verməyənlərin də pulu göndərməsini tapşırıb.

Göründüyü kimi, məktəblərdə davam edən "fond pulu" problemi hələ də öz aktuallığını qoruyub saxlayır. Şagirdlərdən müəyyən adılar altında sinif rəhbərləri yaxud direktorlar tərəfindən müəyyən miqdarda vəsait toplanır. Belə olan halda həmin vəsaitin xərcləndiyi istiqamətlər maraq doğurur. Məktəblərdə "fond pulu" adı ilə yığılan pullar hara xərclənir?

Mövzu ilə bağlı Sonxeber.az-a danışan təhsil məsələləri üzrə ekspert Elçin Əfəndi deyib ki, illərdir "fond pulu" adı altında məktəblərdə müəyyən yığımlar həyata keçirilir. Birinci növbədə burada "fond pulu" anlayışına gəlib baxmalıyıq:

" "Fond pulu" o halda formalaşır ki, hər hansı bir şagirdin xaricdə təhsil almasına, ölkə universitetlərinə düşürsə, ödənişli təhsil varsa ona yardım məqsədilə həyata keçirilir. Bu da yalnız könüllük, şəffaflıq və obyektivlik prinsipi qorumaqla yaranan bir fond olmalıdır. Amma bizdə bu "fond pulu" anlayışı başqa cür formalaşıb. Bununla da "süpürgə pulu" kimi qəribə adlar altında şagirdlərdən pul yığırlar. Bu pulların konkret hara xərcləndiyi, hansı istiqamətdə yönləndirilməsi ilə bağlı konkret hesabat verilmir. Belə olan halda şagirdə, valideynə və cəmiyyətə maraqlıdır ki, bu pulu yığılırsa, hara xərclənir".

Ekspertin sözlərinə görə, hansısa direktor çıxıb deyir ki, vəsait məktəbin təmirinə xərclənir. Bu məktəbin təmirini Elm və Təhsil Nazirliyinin vəsatəti əsasında dövlət büdcəsindən maliyyə ayırmaqla dövlət tərəfindən həyata keçirilir. Hətta neçə illərdir ki, Heydər Əliyev Fondu tərəfindən nə qədər məktəblər təmir olunub:

"Qurumdan tərəfindən öhdəlik götürülür və təmir həyata keçirilir. Belə çıxır ki, məktəbin təmiri üçün direktor 100 min manata yaxın pul yığa bilir. Yəni bu kimi hallardan istifadə edən məktəb direktorları birmənalı olaraq görünən odur ki, həmin vəsaiti mənimsəyiblər. Yekunda isə fond pulu yığım məsələsi qanunvericilik tələbinin pozulması mənasını verir. Hər hansı bir yığım şagirddən olmamalıdır. Bu istər "təhsil haqqında" qanunda, istərsə də digər qanunvericilikdə nəzərdə tutulan faktordur. Məktəb direktoru, onun müavini yaxud müəllim belə olsa, onun ixtiyarı yoxdur ki, şagirddən pul tələb etsin. Belə hal yaşanırsa, valideyn dərhal aidiyyəti üzrə hüquq-mühafizə orqanlarına, korrupsiya idarəsinə müraciət etməlidir. Burada hesabatlılıq olmadığı üçün ciddi problemlər var. Fond pulu adı altında yığılan pullar birbaşa mənimsənilir".

Sevda Səfərova

Telegramda izləyin