Bakı metrosunda baş verən DƏHŞƏTLİ OLAYLAR: Təhlükəsizlik necə təmin olunur? - AÇIQLAMA

Xəbər verdiyimiz kimi, Bakı metrosunun "28 May" stansiyasından üzü "Həzi Aslanov" stansiyası istiqamətində gedən qatar yolunda sərnişin relslərin üzərinə yıxılıb. Metronun "28 May" stansiyasında qatar yoluna düşən sərnişin (cinsi kişi) ölüb. Bakı metrosunun "28 May" stansiyasında qatar yoluna düşərək həlak olan sərnişin nazirliyin sabiq əməkdaşı olub. 1957-ci il təvəllüdlü Şərafəddin Abdullayev Fövqəladə Hallar Nazirliyində (FHN) çalışıb və bir neçə ildir ki, təqaüdə çıxıb. Qatar həmin şəxsin üstündən keçib və o, hadisə yerində dünyasını dəyişib. Faktla bağlı Nəsimi Rayon Prokurorluğunda araşdırma aparılır.

Bu il ərzində demək olar ki, bir neçə dəfə sərnişinlərin qatar yoluna düşməsi kimi hallar yaşanıb. Edilən xəbərdarlıqlara baxmayaraq, bu kimi hallar sərnişinlərin diqqətsizliyindən irəli gəlir. Baş verən hadisələrin səbəbləri fərqlidir. Bəs Bakı metrosunda təhlükəsizlik necə təmin olunur?

Mövzu ilə bağlı Sonxeber.az-a danışan "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov deyib ki, belə hadisələr "Bakı Metropoliteni"ndə baş verib. Onların hər birinin xarakteri, səbəbləri və nəticələri bir-birindən tamamilə fərqlidir. Sərnişin təhlükəsizliyi "Bakı Metropoliteni" üçün prioritet vəzufələr sırasındadır. Bu birmənalıdır. Bütün fəaliyyətin qurulmasında hər bir məsələnin həll prizması məhz sərnişin təhlükəsizliyinə dayanır:

"Bu məsələlərin özünəməxsus nüansları, xarakteri olur. Bu gün sərnişinlərin məlumatlı olması baxımından "Bakı Metropoliteni" istər insan resursları, istər də texniki arsenalında olan bütün imkanlarından fəal və səmərəli şəkildə istifadə etməyə çalışır. Baş verən hadisələr məhz görülən tədbirlərə və mövcud qaydalara, bəzi hallarda sərnişin diqqətsizliyi və sayğısızlığı nəticəsində baş verə bilər. Dünənki hadisə ilə bağlı isə araşdırma aparılır. Səbəblər və nəticələr bəlli olduqdan sonra biz bu barədə danışa bilərik. Bununla bağlı araşdırmalar aidiyyəti qurumların gördüyü tədbirlərdir. Ümumiyyətlə hansı təhlükəsizlik tədbirlərinin gücləndirilməsi hər cari iş günün əsas vəzifələrindəndir. Ən mühüm məsələ burdadır. İşçilərinin bu məsələlər ilə bağlı hazırlıqlı olması, müvafiq qaydada təlimat keçməsi ilə bağlı hər bir şey aydındır. Hər dəfə hadisə baş verəndə konkret olaraq ayrı-ayrılıqda işçilər ilə iş aparılır. Bununla yanaşı, illik plan əsasında işçilərin hazır vəziyyətdə olması həm onlara keçilən təlim-məşğələlərdə, həm də onların cəlb olunmasında, praktiki fəaliyyətində əyani şəkildə yoxlanılır".

Mətbuat xidməti rəhbərinin sözlərinə görə, təhlükəsizliyin təmin edilməsi ilə bağlı iki əsas istiqamət ola bilər. İlk olaraq insan resurslarından istifadə olunması, ikincisi isə texniki məsələdir. İnsan resurslarından istifadə olunması ilə bağlı metropoliten müxtəlif tədbirləri görür. Bunun ən bariz nümunəsi, hər kəsin gördüyü sıxlıq olan stansiyalarda əlavə işçi qüvvəsinin ayrılmasıdır:

" Eyni zamanda eskalatorlarda gur saatlarda nəzarət sisteminin gücləndirilməsidir. Bu kimi məsələlər aydındır. Lakin müvafiq hadisələrin baş verib-verməməsindən asılı olaraq monitorinqlər aparılır. Bu qayda ilə əlavə tədbirlərin görülməsi mütləq qaydada araşdırılır. Texniki nüanslar isə çoxşaxəli və geniş bir məsələdir. Burada daha çox konkret suallar əsasında qurmaq olar. Amma daim belə hadisələr baş verəndə ən aktual məsələ kimi təhlükəsizlik qapılarının qoyulması gündəmə gətirilir. Bizim bununla bağlı mətbuatda bəlli cavanlarımız var. Bu diqqətdən kənarda saxlanılmayan bir mövzudur. Gündəlik iş rejimimizin tərkibində olan bir məsələdir. Konkret olaraq bununla bağlı müvafiq araşdırmalar aparılıb. Amma bu qədər sadə tətbiqin edildiyi bir məsələ deyil. Bunun üçün kifayət qədər əsaslandırılmış böyük işlər aparılmalıdır. Məsələn birinci növbədə platforma səviyyəsinə konstruktiv olaraq əsaslı işləri görülməlidir. Çünki "Bakı Metropoliteni"nin infrastrukturunda hər bir məsələ, tikinti norma və qaydaları digər normativlər ilə tənzimlənir. Biz istəsək evimizin bir divarını söküb yerinə başqa qapı qoya bilərik. Amma Bakı metropolitenində bu birmənalı olaraq qadağandır".

Bəxtiyar Məmmədov vurğulayıb ki, hər bir sahənin özünəməxsus funksionallığı və əhəmiyyəti var. Bu konstruksiyalar nə qədər yüngül olsa belə, ilk növbədə bu prizmadan keçirilməlidir. İkinci vacib məsələ burada onun texniki tərkib hissəsidir. Yəni platformalarda və qatarlarda olan qapıların sinxron və paralel, eyni vaxtda açılmalıdır:

"Qapıların bir-birinə açılmasının düz gəlməməsi hallarına yol verilməməlidir. Bunun üçün təbii ki, dünyada tətbiq olunan aparıcı sistemlər var. Bu sistemlərin tətbiqi sadəcə olaraq bütün qatarlarda və eyni zamanda bütün stansiyalarda birmənalı olaraq tətbiq olunmalıdır. Əks təqdirdə bu sistemin quraşdırılması qeyri-mümkündür. Bunun üçün kifayət qədər böyük vəsait tələb olunur. Amma vəsaitin tələb olunmasından əlavə olaraq, kifayət qədər çoxsaylı məsələlər öz həllini tapmalıdır. Məsələn platforma qapısı quraşdırılandan sonra, qatarların hərəkətindən yaranan hava təzyiqinin tənzimlənməsi, yönləndirilməsi, eyni zamanda stansiya və tunellərin havalandırılması zamanı kompleks olaraq mövcud infrastruktur əsas götürülür. Metropoliten stansiyaları inşa olunarkən onlar platforma qapıları üçün nəzərdə tutulmadığından bu məsələlərə xüsusi yanaşılmalıdır. Platforma qapısının tutduğu sahə və ərazi artıq platformanın sərnişin tutumu və təhlükəsizliyinin təmin edilməsi ilə bağlı aspektləri gündəmə gətirir. Bunlar həllini tapmalıdır. Bunun kimi bir çox amilləri sadalaya bilərik və onların həlli heç də asan bir məsələ deyil".

Sevda Səfərova

Telegramda izləyin