Bu şəxslərin uşaqlarına verilən müavinətin məbləği 250 manata QALDIRILA BİLƏR - AÇIQLAMA

"Sosial müavinətlər haqqında" qanuna son dövrlər edilən dəyişikliklərdən biri də müddətli həqiqi hərbi xidmət keçən hərbi qulluqçularının uşaqlarına müavinətin verilməsidir. Həmin qanunun 4-cü maddəsinə əsasən, müddətli həqiqi hərbi xidmət hərbi qulluqçularının uşaqlarına aylıq müavinətin verilməsi həyata keçirilir. Hazırda aylıq müavinətin məbləği 120 manatdır. Bu müavinət hərbi qulluqçuların həqiqi hərbi xidmətdə olduğu müddətdə ödənilir.

Sözügedən müavinət növü həmin hərbçilərin ailələrinin sosial rifahının yaxşılaşdırılması istiqamətində verilir. Bəs müavinətin məbləği 120 manatdan 250 manata qaldırıla bilər?

Mövzu ilə bağlı Sonxeber.az-a danışan sosioloq Mətanət Məmmədova deyib ki, Müddətli həqiqi hərbi xidmət keçən hərbçilərin uşaqlarına verilən 120 manat məbləğin 250 manata çatdırılması daha yaxşı olardı:

"Bu daim çətin iş şəraitində olan hərbçilərimizin sosial rifahının artmasına səbəb olardı. Bütün sahələrdə deyirik ki, verilən müavinətlərin məbləği artırılsın. Uşaqpulunun verilməsi, bu cür müavinətlər və digər sosial ödənişlərin artırılması vətəndaş rifahının təmin olunması deməkdir. Lakin bir məsələni nəzərimizdən qaçırmamalıyıq. Biz müharibədən yenicə çıxmış bir ölkəyik. Bu gün işğaldan azad olunmuş ərazilərdə quruculuq və abadlıq işləri həyata keçirilir. Hansı ki, o torpaqlarda hər kəsin bildiyi kimi daş üstə daş qalmayıb. Bizim 30 ildən məcburi köçkün düşmüş soydaşlarımız var. Onlar ata-baba yurdlarından hələ də uzaqda yaşayırlar. Onların yerləşdirilməsi və yaşaması üçün həmin ərazilərə xeyli məbləğdə vəsait ayrılır. Bütün bunlara görə, hələlik bu cür müavinətlərin artırılmasından danışmamalıyıq".

Sosioloqun sözlərinə görə, həmin ərazilərdə abadlaşma aparılmalıdır ki, illərdir gözləri yollarda qalan soydaşlarımız orada yaşaya bilsinlər:

"Statistikaya baxsaq her il pensiya, sosial ödəniş və əməkhaqlarında artım tempi müşahidə olunub. Bu cür müavinətlərin artırılması qarşıdakı illərdə artırılması gözləniləndir. Yalnız hər şey zamana bağlıdır. Hərbçilərin uşaqlarına verilən müavinətlərin, pensiya və əməkhaqlarının artırılması zamanla həyata keçiriləcəkdir. Hərbçilər bizim təhlükəsizliyimizin təminatçılarıdır. Onlar üçün sosial rifah halları artırılarsa, bu bütün ölkənin təhlükəsizliyi deməkdir. Ucqar ərazilərdə xidmət edən, ailəsindən aylarla uzaqda qalan hərbçi üçün bu müavinətin artırılması vacibdir. Eyni zamanda onların rifahının yaxşılaşdırılması övladlarının gələcəyi deməkdir. Ümidvaram ki, yaxın gələcəkdə bütün bunlar mərhələli şəkildə həyata keçiriləcəkdir".

Sevda Səfərova

Telegramda izləyin