Yayın qorxulu bəlası olan ÇİMƏRLİKLƏR: Çaylar və göllərə giriş QADAĞAN OLUNACAQ? - AÇIQLAMA

S9on zamanlarda rayonlarda vətəndaşların çaylarda, göllərdə və çimmək üçün nəzərdə tutulmayan su hövzələrində boğulma halları müşahidə olunur. Buna nümunə olaraq Cəlilabadda su bəndində iki uşaq boğulması halını xatırlada bilərik. Bənddə çimərkən boğulan şəxslər - 16 yaşlı Nihat Aşurov və 20 yaşlı İbrahim Həsənovdur. Daha əvvəl isə Saatlıda 19 yaşlı gənc çayda çimərkən boğulub. Hadisə Araz çayının rayonun Seyidlər kəndi ərazisindən keçən hissəsində qeydə alınıb.

Göründüyü kimi mövsüm açıq elan edilməmişdən əvvəldə bu hallara rast gəlinib. İnsanlar nəzərdə tutulmayan su hövzələrinə üz tutmaqla həyatlarını təhlükəyə atırlar. Bəs çaylar və göllərə giriş qadağan edilə bilər?

Mövzu ilə bağlı Sonxeber.az-a danışan Elmar Nuraliyev deyib ki, çaylarda və göylərdə, o cümlədən çimmək üçün nəzərdə tutulmayan yerlər insanlar üçün təhlükəlidir.Valideynlər bu istiqamətdə uşaqlarına nəzarət etməlidir. Azyaşlı uşaqları çaylar və göllərdə çimməkdən çəkindirməlidir:

"Elə insanlar var ki, tanıdıqları çaylar yaxud göllərə illərdir ki gedir və çimərlik mövsümü gələn kimi bu su hövzələrinə çimməyə gedirlər. Ancaq hadisə olanda birdən baş verir. Bunu nəzərə almaq lazımdır. Göllər, çaylar və su anbarları çimmək üçün nəzərdə tutulmayıb. Yəni kanallarda, çaylarda axın sürəti ilə suyun altında olan axın sürəti arasında minimum 4-5 dəfəyə qədər fərq olur. O cümlədən suyun dibində yosunlar və bitkilər, şüşə butulkalar, daş parçalar ola bilər. Bu da çimən şəxsi zədələyə, suyun dibinin bataqlıq olması isə onun həyatını təhlükəyə ata bilər. Fəaliyyətinə icazə verilən çimərliklərdə mövsüm başlamamışdan qabaq müvafiq qurumlar tərəfindən suyun dibinin akvatoriyası öyrənilir. Suyun dibinin relyefi, daş parçaları, axın sürəti öyrənilir. O cümlədən suyun fiziki-kimyəvi xassələri araşdırılır. Əgər çimərliklər insanların həyat və sağlamlığına təhlükə yaratmırsa, ondan sonra vətəndaşlara icazə verilir. Göllər və çaylarda suyun dibi və keyfiyyəti yoxlanılmır. Orada çimən şəxslərə maarifləndirmə işləri aparılsa da, yenə də insanların çaylarda və göllərdə boğulma halları davam edir".

Ekspertin sözlərinə görə, çaylar və göllərə qadağa qoyulması, çay boyu hansısa hasara alma tədbirləri aparmaq düzgün yanaşma olmaz:

"Həm də fiziki olaraq bunu etmək mümkün deyil. Əlbəttə ki, həmin yerlərdən daimi istifadə olunur. Amma orada xəbərdar etmə yaxud maarifləndirici lövhələr qoyula bilər. Eyni zamanda müəyyən növbələr təşkil etməklə çimən şəxslərə qarşı müəyyən tədbirlər görülə bilər. O cümlədən bu istiqamətdə reydlər həyata keçirilə bilər. Digər tərəfdən əgər eyni yerdə dəfələrlə boğulma halları olubsa, həmin bölgəyə nişanlar qoyula bilər. Digər tərəfdən sözügedən istiqamət üzrə boğulma halları müşahidə edilibsə, bloklama təşkil edilə bilər. Belə bir tədbirlər keçirilə bilər".

Sevda Səfərova

Telegramda izləyin