Cənubi Qafqazda və türk dünyasında yerimizi qorumaq üçün ordumuzu GÜCLƏNDİRMƏLİYİK

Azərbaycan Silahlı Qüvvələrinin yaradılmasından 106 il ötür. Ölkəmizdə müdafiə və milli təhlükəsizlik xərcləri üçün 2024-cü ilin dövlət büdcəsi xərclərinin 17,5 faizi həcmində və ya 6,4 milyard manatdan artıq vəsait nəzərdə tutulub. Hökumət bu istiqamətdə beynəlxalq təcrübələri öyrənir, orduda aparılan islahatlar üzrə modernləşmə işləri aparır, təhsilə, kadr hazırlığına diqqət yetirir. 44 günlük müharibə dönəmində və uğurla keçirilən antiterror əməliyyatları zamanı ordumuz döyüş qabiliyyəti ilə bir daha öz gücünü sübut etdi.

Artıq ilkin sülh müqaviləsinin imzalanması ilə bağlı xəbərlər eşidirik və bu istiqamətdə ekspertlərin rəyləri müsbətdir. Delimitasiya və demarkasiya prosesləri davam etdirilir və iki ölkə arasında danışıqlar aparılır. Lakin buna baxmayaraq, Ermənistan tərəfindən atəşkəsin poozulması, təxribatların törədilməsi istiqamətində addımlar atılır. Belə olan təqdirdə ordumuzun təkmilləşdirilməsi ilə bağlı hansı işlər aparılmalıdır?

Mövzunu Sonxeber.az-a şərh edən hərbi ekspert Üzeyir Cəfərov deyib ki, 30 ilə yaxın müddətdə torpaqlarımızın işğaldan azad olunmasında misilsiz xidmətləri olan Silahlı Qüvvələrimiz sabah özünün 106-cı tarixi ildönümünü qeyd edəcək:

"Ordumuz dövlətimiz və xalqımızın başını uca edib. Hal-hazırda sülh müqaviləsinin imzalanması ilə bağlı müəyyən xəbərlər eşidirik. Əlbəttə ki, sülh müqaviləsi imzalanmasa da Ermənistana havadarlıq edənlər hər şeyi gözəl bilirlər. Azərbaycanın güclü ordusu var. Ona görə də ölkənin siyasi-hərbi rəhbərliyi ordunun gücləndirilməsi istiqamətində bir çox işlər görür. Azərbaycan Müdafiə Nazirliyi və Baş Qərargah rəisi ordunun gücləndirilməsi ilə bağlı müvafiq addımlar atır. İkitərəfli münasibətlər və lazımi silah-sursatın əldə olunması ilə bağlı müəyyən müzakirələr aparılır".

Ekspertin sözlərinə görə, görülən bütün işlər ordunun güclənməsi və döyüş qabiliyyətinin daha da artmasına xidmət edir:

"Ümid edirəm ki, Azərbaycan Silahlı Qüvvələri daha üstün mövqelərdə olacaq. Dünyanın aparıcı dövlətləri və hərbi mütəxəssislər Azərbaycan ordusunun gücü ilə bağlı bilgiləri dünya ictimaiyyətinin diqqətinə çatdıracaqdır. Eyni zamanda ordunun strukturları mütləq şəkildə təkmilləşdirilməlidir. Ordunun tərkibində hərbi təhsil və tibb kimi istiqamətlərin gücləndirilməsinə ehtiyac var. Ordumuzun təkmilləşdirilməsi ilə bağlı planda çox işlər var. Onlar tez bir zamanda öz həllini tapacaqdır. Cənubi Qafqazda və türk dünyasında yerimizi qorumaq üçün ordumuzun döyüş qabiliyyətini gücləndirməliyik".

Telegramda izləyin