Yolda keçirdiyimiz vaxt iş saatına ƏLAVƏ EDİLƏCƏK? - AÇIQLAMA

Bü gün paytaxtın kənar ərazilərində yaşayan şəxslər yol problemindən əziyyət çəkir. Uzaq məntəqələrdə məskunlaşan vətəndaşlar iş yerinə çatmaq üçün saat yarım vaxtını yollarda və tıxacda keçirir. Əlbəttə ki, bu digər tərəfindən insanlar arasında aqressiyanın yaranması ilə nəticəənir. Avtobusların sürətinin azaldılması sərnişinlər və sürücülər arasında münaqişələr yaradır. Bu gün vətəndaş işə gec çatan zaman müdiri tərəfindən danlanır.

Belə olan təqdirdə yolda xərclədiyimiz vaxt bizim iş saatımıza əlavə edilə bilər? Mövzunu Sonxeber.az-a şərh edən sosioloq Mətanət Məmmədova deyib ki, tıxacın yaranması səbəbi kimi Bakıda məskunlaşmanı, avtomobil sayının çox olmasını göstərənlər, hətta avtomobil yollarından gileylənənlər var:

"Lakin bunların heç biri fikrimcə, doğru deyil. Çünki əhali sayı ilə müqayisədə avtomobil sayı normaldır. Bakıda olan yol infrastrukturu isə ərazisi ölkəmizin ərazisindən dəfələrlə böyük olan, iqtisadi inkişafı bizimlə müqayisədə çox yüksək olan qonşu Türkiyənin yollarından müasir və abaddır. Bunu aid sahənin ekspertləri də təsdiq edir. Bakıda tıxacı yaradan sürücülərdir. Onların yol hərəkəti qaydasına düzgün riayət etməməsi tıxacın yaranması ilə nəticələnir. 4 zolaqlı yollarda səkkiz sıra avtomobil düzüləndə burada tıxac nədir, qəzanın da baş verməsi hər an gözlənəndir. Bütün bunlar isə ictimai və taksi nəqliyyatından istifadə edən şəhər sakinləri, eləcə də Bakı ətrafı kəndlərdən şəhərə işləməyə gələn insanlar üçün gündəlik problem yaradır. Vətəndaş evdən nə qədər tez çıxsa da, tıxac səbəbindən iş yerinə vaxtında çata bilmir. Üstəlik əsəb və gərginlik keçirir, bu da sağlamlığına təhlükə yaradır".

Sosioloqun sözlərinə görə, yolda xərclənən saatın iş vaxtına əlavə edilməsinə gəlincə isə, bu, mümkün olan məsələ deyil:

"Yəni bu, problemin həlli ola bilməz. Ölkəmizdə Əmək Məcəlləsi ilə səkkiz saatlıq iş vaxtı müəyyən olunub. Yəni yollarda tıxacın olması bunun dəyişmə səbəbi ola bilməz.
Gərəkdir ki, tıxacın aradan qaldırılması uçun yollar fikirləşib tapılsın. Məsələn, yol kənarlarına düzülən avtomobillər yığışdırılsın, parkovka üçün yerlər müəyyən edilsin. Yeni binalar tikilərkən bu, xüsusilə nəzərə alınsın. Tıxac yaradan sürücülər üçün cərimələr tətbiq olunsun və sair".

Sevda Səfərova

Telegramda izləyin