Sui-qəsd SSENARİLƏRİ: Siyasətçilər "qurban"a ÇEVRİLİR? - ŞƏRH

Xəbər verdiyimiz kimi, ABŞ-nin Pensilvaniya ştatında Respublikaçılar Partiyasının builki prezident seçkisində namizədi Donald Trampa mitinqi zamanı atəş açılıb, siyasətçi qulağından xəsarət alıb. ABŞ-nin Federal Təhlükəsizlik Bürosu prezidentliyə namizəd Donald Trampa edilən hücumu "sui-qəsd cəhdi" kimi təsnifatlandırıb.

Daha əvvəl isə Slovakiya Baş naziri Robert Fitso sui-qəsd nəticəsində döş qəfəsi və qarın nahiyəsindən üç güllə yarası almışdı. Fitsoya qarşı silahlı hücum mayın 15-də, Trampa qarşı sui-qəsd cəhdi isə iyulun 13-də baş verib. Slovakiyanın Baş naziri Robert Fitso deyib ki, ABŞ-nin keçmiş prezidenti Donald Trampa və ona qarşı sui-qəsd oxşar ssenari ilə hazırlanıb. Bəs siyasətçiləri qarşı edilən sui-qəsd planlarının arxasında hansı səbəblər dayanır?

Mövzunu Sonxeber.az-a şərh edən politoloq Turab Rzayev deyib ki, Bu məsələ kifayət qədər ciddidir. ABŞ-də prezidentliyə namizəd, eləcə də keçmiş prezident olmuş bir şəxsin sui-qəsdə məruz qalması sıradan bir hadisə deyil. Ona görə də bu bütün dünya ictimaiyyətinin diqqətini cəlb etdi:

"Bununla əlaqədar fərqli mülahizələr ortaya atılmağa başladı. Birincisi odur ki, Trampın rəqibləri bu addımı atmış ola bilər. Demokrat partiyası və dəstəkçiləri Trampın hakimiyyətə gələrək izolyasiya siyasəti yeriyməyini istəmirlər. Tramp Avropa İttifaqı və digər ölkələr ilə inteqrasiya əleyhdarı idi. İlk ağla gələnlər onlardır ki, Trampı fərqli üsullar ilə uzaqlaşdırmağa çalışdılar. Daha sonra bunlar hansısa radikal şəxs ola bilər. Tramp milli, cinsi, irqi azlıqlara qarşı siyasət ortaya qoyur. Xüsusilə bu siyasət miqrantlara qarşı yeridilir. ABŞ özü kifayət qədər silahlanmış ölkədir. 100 milyonlarla ölkədə silah var. 10 milyonlarla əhalinin özündə silahlar mövcuddur. Bu silahları əldə etmək çətin bir şey deyil. Bunu da nəzərə almaq lazımdır. Eyni zamanda bu məsələnin fərqli məqamlar var. Yəni Trampın partiyasında ona müxalif olanların açıqlamaları var. Məsləhət Respublikaçılar partiyası Trampın namizədliyinin qarşısını ala bilmədilər. Onu ancaq fiziki olaraq məhv etsələr, onun yerinə daha fərqli namizəd çıxara bilərlər. Bu görüşdə olanlar var. Demokratlar Baydenin namizədliyini geri çəkmək istədilər. Geri çəkməyə nail ola bilmədilər. Bu şəkildə əgər Tramp aradan qaldırılarsa, Baydenin qələbə qazanma şansı olduğunu iddia edənlər var".

Politoloqun sözlərinə görə, bu proses Trampın özünə daha çox xeyir verə bilər. Mövcud siyasi görüntüdən sonra Trampın tərəfdarlarının sayı arta bilər:

"Bu siyasi görüntüdən sonra Tramp tərəfdarlarının sayı artacaq. Onun burada qələbə şansı xeyli artdı. Xüsusilə hücumdan sonra Trampın dik duruşu və ictimaiyyətə səslənişi, tərəfdarlarının ona yumruqla cavab verməsi o deməkdir ki, Tramp buradan güclü olaraq çıxdı. Bəziləri iddia edir ki, bu düşünülmüş ssenaridir. Burada Trampı maksimum az zədə ilə bir "qurban"a çevirməyə çalışırlar. Mən bu məsələdə kifayət qədər texniki çətinliklərin olduğunu düşünürəm. Çünki Tramp faktiki olaraq qulağından yara alıbsa, orada ani bir səhv onun həyatının itirməsi ilə nəticələnə bilərdi. Bu baxımdan çox riskli bir addımdır. Ona görə də Trampın bu oyun içərisində olması çox şübhəli görünür. Nəzərə alaq ki, atışmada iki nəfər Tramp tərəfdarı ehaytini itirib. Bir nəfər isə ağır yaralanıb".

Turab rzayev bildirib ki, Trampın əsas dəstəkçisi olan hərbi sənaye kompleksinin, mühafizəkar elitanın rolu olduğunu iddia edənlər var:

"Yəni Trampın özünün xəbəri olmadan onu "qurban"a çevirmək, dəstəkçilərinin sayını artırmaq məqsədilə belə bir addım ata bilərlər. Burada güllə ilə Trampa sadəcə bir neçə millimetr fərqli məsafədə atəş açılsaydı o həyatını itirə bilərdi. Onun lehinə olaraq planlanmış addım olması xeyli sual yaradır. İstənilən halda siyasətçilərin belə bir sui-qəsdə məruz qalması, dünya ictimaiyyətinin nəzərində olması ölkələrin imici və beynəlxalq siyasi mühit üçün yaxşı nəticələr vəd eləmir. Bu ölkədə tərəflər arasında gərginliyin artacağını göstərir".

Sevda Səfərova

Telegramda izləyin

instagramda izləyin