Futbol matçı zamanı məşqçi DÖYÜLDÜ: Azarkeşlər niyə şiddətə MEYİLLİDİR?

Xəbər verdiyimiz kimi, AFFA U-16 Liqasının yarımfinalı çərçivəsində keçirilən "Zirə"-"Neftçi" matçında qonaq komandanın məşqçisi İsmayıl Məmmədov azarkeşlər tərəfindən döyülüb. Matçın 36-cı dəqiqəsində yerli azarkeşlər qonaq komandanın köməkçi məşqçisi İsmayıl Məmmədova hücum çəkiblər. Bu barədə görüntülər "Neftçi TV"nin canlı yayımında əks olunub. Sözügedən oyunda məşqçinin döyülməsi ilə bağlı polisə hər hansı müraciət daxil olmayıb.

Göründüyü kimi, istər idmançılar, istərsə də azarkeşlər arasında zaman -zaman şiddət, qalmaqal və aqressiya halları yaşanır. Əfsuslar olsun ki, bu gün başda gənc nəsil olmaqla, bir çoxları mübahisəni ağıl ilə deyil, güc nümayiş etdirməklə həll etməyə çalışırlar. Bəs idmanda, matçlar zamanı niyə davalar yaşanır? İnsanlar niyə şiddətə meyilli olurlar?

Məsələ ilə bağlı klinik psixoloq, psixoterapevt Rövşən Nəcəfov Sonxeber.az-a açıqlamasında bildirib ki, idman sahəsində insanların davranışları ictimai həyatda qəbul edilməzdir:

"İdman sağlamlıq və mədəniyyətdir. İdmanla məşğul olanlar anlamalıdırlar ki, oyunda olan oyunda qalır. Kənar oyun anlayışı yoxdur. Məğlubiyyət və qalibiyyət idmanda bir-birini əvəzləyir. Məğlub olmağı bacarmayanlar qalibiyyətin nə olduğunu dərk edə bilməzlər, və ya əksinə. İdmanda rəqabət olmalıdır, amma rəqabət düşmənçiliyə çevrilməməlidir. Azarkeşlik sevgi üzərində formalaşmalıdır. Rəqibə qarşı nifrətlə azarkeşlik etmək olmaz. Düşüncə dəyişilməlidir. İdman psixoloqlarına ehtiyac var".

Psixoloqun sözlərinə görə, idman sahəsində hər zaman həyəcan var. İdmançılar və azarkeşlər idmana olan maraqlarını müxtəlif emosiyalarla ifadə edirlər:

"Həyəcan müsbət mənada yaxşıdır. İnsanlar idman yarışlarında stresslərini atırlar. Amma unutmamalıdırlar ki, ictimai həyatın qaydaları idman qaydaları ilə davam edə bilməz. Hər bir idman sahəsində psixoloq olmalıdır ki, psixoloji mühitin dəyərləndirilməsini apara bilsin. İdman psixoloqu istiqamətində ixtisaslaşma aparılmalıdır ki, mənfi hadisələrə qarşı qabaqlayıcı tədbirlər görülsün. Psixoloji mühitin sağlam olması üçün davamlı psixoloji maarifləndirmə fəaliyyətləri aparılmalıdır. Yarışlarda nifrətə qarşı sevgi fikirləri ifadə olunmalıdır".

Qeyd edək ki, tərəflər arasında şikayətə səbəb olacaq hadisə baş vermədiyi üçün polisə müraciət edilməyib. Buna baxmayaraq yayılan görüntülərlə əlaqədar ərazi polis orqanında araşdırma başlayıb. Hadisə iştirakçılarının şəxsiyyəti dəqiqləşdirilir. Araşdırmanın nəticəsi barədə məlumat veriləcək.

Sevda Səfərova

Telegramda izləyin