"Səfirliyin fəaliyyətinin bərpası Azərbaycan-İran əlaqələrinin gələcək inkişafına töhfə verəcək" - DEPUTAT

Xəbər verdiyimiz kimi bu gün Azərbaycanın İrandakı səfirliyinin fəaliyyəti bərpa edilib.

Bununla bağlı Sonxeber.az-a danışan deputat İqbal Məmmədov bildirib ki, Azərbaycan hər zaman qonşu ölkələrlə dost münasibətdə olub:

"Azərbaycanla İran iki dost ölkədir. Dini, milli bağlılıq, adət və ənənələrin oxşarlığı iki ölkə arasında əlaqələrin dostluğa çevrilməsində böyük rol oynayıb. Tarix boyu İran və Azərbaycan xalqları bir yerdə yaşayıb-yaradıblar. 44 günlük Vətən müharibəsində əldə etdiyimiz möhtəşəm zəfərdən sonra regionda yeni reallıq yarandı. Ən önəmlisi regionda sabitlik və əmin-amanlıq yenidən bərpa edildi. Bütün bölgədə sabitlik və inkişaf üçün Azərbaycanla İranın dostluğuna və qardaşlığına da böyük ehtiyac var".

Deputat vurğulayıb ki, iki ölkə arasındakı qarşılıqlı hörmət və anlaşma nəhəng layihədə, aparılan danışıqlarda və əldə edilmiş razılaşmalarda özünü göstərir:

"Bu gün regionda mövcud sabitliyi pozmağa çalışan bəzi qüvvələr iki ölkə arasında münasibətləri hər zaman gərginləşdirməyə çalşıblar. Azərbaycanın Tehrandakı səfirlik binasına olan terror hücumu da məhz münasibətləri gərginləşdirməyə hesablanmış addım idi. Amma xalqlar arasındakı tarixi bağlılıq və mehriban qonşuluq münasibətləri yaradılan bütün problemlərin aradan qaldırmaq üçün yetərli oldu. Səfirliyin fəaliyyətinin bərpası qarşılıqlı hörmətə və mehriban qonşuluğa əsaslanan Azərbaycan-İran əlaqələrinin gələcək inkişafına, iki ölkə arasında əldə edilmiş razılaşmaların və həlli zəruri olan məsələlərin icra olunması işinə töhfə verəcək".

Telegramda izləyin