Ağadadaş Ağayevin balta ilə adam yaraladığı insidentlə bağlı YENİ DETALLAR

Xalq artisti Ağadadaş Ağayevin törətdiyi insidentin bəzi detalları məlum olub.

Belə ki, Ağadadaş Ağayev özünə məxsus olan "Büsat" şadlıq evinin həyətində ikimərtəbəli ev tikib, orada yaşayır. İnsident baş verən gün Ağadadaş Ağayev yaşadığı evin həyətindən çıxıb və 20 addımlıq yolu keçməklə birbaşa "MedEra" klinikasının həyətinə, mühafizəçi postuna yaxınlaşıb, qulağındakı ağrılarla bağlı müraciət edib. Orada mühafizəçidən tələb edib ki, sağlıq durumu ilə bağlı evinə həkim göndərilsin. Mühafizəçi isə belə bir səlahiyyətinin olmadığını, həkim üçün birbaşa klinikanın özünə yaxınlaşmalı olduğunu deyib. Mühafizəçinin cavabı Xalq artistinin xoşuna gəlməyib, tərəflər arasında sözlü mübahisə yaranıb. Mühafizəçi də Xalq artistinə cavab qaytarıb. Səhər saat 7 radələrində yaranmış mübahisə Xalq artistinin evinə gedib oradan balta ilə geri qayıtması ilə daha da qızışıb, balta-yumruq-təpik davasına qədər böyüyüb. Digər bir iddiaya görə, Ağadadaş Ağayevin dəfələrlə klinikaya müraciət etməsinə baxmayaraq onun probleminə əlac tapan olmayıb və ona görə də o, bu yola əl atıb.

Hadisə zamanı A.Ağayev balta ilə hücum etdiyi mühafizəçi Nurəddin Cəlilovun burnunu da sındırıb.

Bildirilir ki, sözügedən mühafizəçinin xəstəxana ilə heç bir əlaqəsi yoxdur. O, binanın ətrafının mühafizəsi ilə məşğuldur. Klinikanın özünün mühafizəçiləri başqa şəxslərdir.

"MedEra" klinikasının hüquqşünası Xeyransa Babayeva Müsavat TV-nin əməkdaşına açıqlamasında Ağadadaş Ağayevi ittiham edib.

"Ağadadaş Ağayev ümumiyyətlə bizim klinikada qeydiyyatda olmayıb, heç bir həkimimizin xəstəsi də deyil. Sadəcə qulağında xırda bir fəsad olub və ona tibbi yardım göstərilib. Bunlar hamısı insidentdən bir gün qabaq olub. Nurəddin Cəlilov isə bizim klinikanın işçisi deyil. Sadəcə bizim klinikanın çalışdığı mühafizə xidmətinin əməkdaşıdır. Həmin şəxs Ağadadaş Ağayevin klinikaya tərəf balta ilə gəldiyini gördüyü üçün ona mane olmağa çalışıb. Atılan baltanı isə bizim işçilər hadisə zamanı gizlədiblər ki, başqa birinə vurmaq ehtimalı ola bilər. "MedEra" klinikası isə insidentlə bağlı hüquq-mühafizə orqanlarına rəsmi müraciət etməyib. Baş verən hadisə ilə bağlı sadəcə iş gedir".

Telegramda izləyin