"Cənab prezident İlham Əliyevin idman sahəsinə ayırdığı yüksək diqqət idmançılarımız üçün çox böyük stimuldur" - DEPUTAT

"Bu gün dövlətimiz tərəfindən idman sahəsinə xüsusi diqqət göstərilir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, cənab prezident İlham Əliyevin bu sahəyə ayırdığı yüksək diqqət idmançılarımız üçün çox böyük stimuldur:

"İdmançılarımız da dövlət başçımızın onlara olan etimadı daim doğruldaraq bizi öz qələbələri ilə sevindirirlər. Bir neçə gün öncə Azərbaycan cüdoçusu Hidayət Heydərov Fransanın paytaxtı Parisdə keçirilən Yay Olimpiya Oyunlarının qalibi oldu. O, 73 kq çəki dərəcəsində yer alan idmançı finalda fransalı Con Benjamin Qabanı üstələməklə olimpiadanın qızıl medalını qazanıb.Onun bu qələbəsi hər bir azərbaycanlı kimi məni də sevindirdi. Qalib ölkənin vətəndaşı olmağın qüruru idmançılarımızı daha əzmlə mübarizə aparmağa təşviq edir. Ölkəmizdə idmana göstərilən diqqət, bu sahəyə marağın yaradılması və getdikcə artırılması gələcək nəsillərin sağlam yetişməsini diqqətdə saxlayan dövlətin məqsədli tədbirlərinin bir hissəsidir. Gənclərin fiziki aktivliyinin artırılması, əyləncə və maraqlarının bu yolla təmin olunması onları pis vərdişlərdən uzaqlaşdıran ən yararlı metodlardan biridir".

Deputat vurğulayıb ki, bu gün ölkəmizdə ölkəmizdə idman obyektlərinin tikilib istifadəyə verilməsi, uşaq və gənclərin idmanın müxtəlif sahələrinə cəlb olunması prosesi sürətlə davam etdirilir:

"Qələbə qazanaraq ölkəmizin idman şərəfini layiqincə qoruyan idmançılara göstərilən diqqət və qayğı da gənclərin bu sahəyə olan marağını daha da artırır. Mütəmadı olaraq cənab prezident İlham Əliyevin idmançılarla görüşməsi xoş bir ənənəyə çevrilib. Keçirilən bütün görüşlər idmançıların daim diqqətdə olmalarının sübutudur.

Təkcə paytaxtda deyil, bölgələrdə də idman sahəsinin inkişafı üçün böyük işlər görülür. Bölgələrdə Olimpiya İdman Komplekslərinin yaradılması idmana dövlət səviyyəsində diqqətin göstəricisidir. 44 günlük Vətən müharibəsində və ondan sonrakı dövrdə işğaldan azad olunmuş ərazilərimizdə aparılan bərpa-quruculuq işlərinin önəmli bir hissəsinin də idman sahəsinə ayrılması təqdirəlayiqdir. Yeni yaradılmış şərait nəticəsində qısa zaman ərzində işğaldan azad olunmuş bölgələrdə beynəlxalq yarışların təşkili ölkəmizdə idmanın inkişafının təmin olunması istiqamətində aparılan kompleks işlərin bir hissəsidir.
Ümumilikdə isə əldə olunan bütün uğurlar ölkəmizin və idmanımızın beynəlxalq nüfuzunu artırır".

Telegramda izləyin