Azərbaycanda alimentin verilməsi 25 yaşa qədər ARTIRILSIN - TƏKLİF

Xəbər verdiyimiz kimi, Rusiya Dövlət Dumasında valideynlərin uşaqlarını 23 yaşına qədər saxlamağa məcbur edilməsi təklif olunub. Bununla bağlı qanun layihəsini Rusiya Liberal Demokrat Partiyasından (LDPR) seçilən deputatlar Dumaya təqdim ediblər. Bildirilir ki, yeni layihə uşaqları əyani təhsil alan valideynlər üçün nəzərdə tutulub. Layihəyə görə, əgər valideynlər arasında aliment ödənişi barədə razılaşma yoxdursa, bu məbləği pul şəklində məhkəmə müəyyən edəcək. Gələcəkdə rusiyalılar bu vəsaiti 23 yaşına qədər hər ay öz uşaqlarına ödəməli olacaqlar. Əgər tələbənin valideynlərindən maddi dəstək almaq imkanı olmasa, bu halda bacı-qardaşlar, nənə və babalar kömək edə bilərlər.

Bu gün ölkəmizdə boşanmaların sayı gündən-günə artır. Ailəsi dağıldıqdan sonra himayəsində kiçik yaşlı uşaqlarla tək qalan ana maddi problemlər ilə üzləşir. Bu kimi problemlər uşaqların psixologiyasında ciddi travmalar yaradır. Ata isə müxtəlif bəhanələr gətirməklə alimentdən yayınır və gəlirlərin əsas hissəsini gizlədir. Valideynlər istər birgə nikah, istərsə də nikah bitəndən sonra uşaqları himayə etməyə, onların maddi və mənəvi ehtiyaclarını qarşılamağa borcludurlar. Belə olan təqdirdə, Azərbaycanda aılimentin verilmə müddəti 18 yaşdan 23 yaşa qədər artırıla bilərmi?

Mövzunu Sonxeber.az-a şərh edən sosioloq Mətanət Məmmədova bildirib ki, Aliment bütün dövlətlər üçün əsas məsələlərdən biri olub:

" İlk olaraq düşünürəm ki, ailələrin dağılmaması daha vacibdir. Ailə öz dəyərini bilməli və ər-arvad bunu anlamalıdır. Bəzi müəyyən səbəblərdən ailələr dağılırsa, aliment ortaya çıxır. Alimentin müddətinin 23 yaşa qədər uzadılması çox gözəl bir məsələdir. 23 yaş bir fərdin gənclik çağıdır. İnsanın bu zaman ailəyə daha cox ehtiyacı olur. O yaşda olan insan təhsil alır, başqa problemlər üzə çıxanda valideyn övladına dəstək olmalıdır. Rusiyada alimentin 18 yaşdan 23 yaşa qaldırılması ümumi vətəndaşlar üçün nəzərdə tutulmaya bilər. Bəzi imtiyazlı şəxslər üçün bu addım atıla bilər. Yəni hər bir boşanan ailənin övladına 23 yaşına qədər aliment verməsini hər kəsə şamil olacağını düşünmürəm. Bu bəzi imtiyazlar ilə bağlı ola bilər. Bu bizim ölkəmizdə əvvəldən mövcuddur".

Sosioloqun sözlərinə görə, ümumi aliment yaşı Azərbaycanda 18-ə qədərdir. Lakin bəzi imtiyazlı uşaqlar var ki, onlarda aliment yaşı 18 -dən yuxarıdır:

" Buna birinci qrup əlilləri nümunə göstərə bilərik. Onların sağlamlıq imkanları məhdud olduğundan aliment yaşı yuxarıdır. Əgər övladın sağlamlığı bərpa olunarsa, məhkəmə tərəfindən bununla əlaqədar qərar qəbul edilərsə, aliment o zaman dayandırıla bilər. Əks halda həmin uşağa alimentin verilməsi davam edir. Yaxşı olar ki, nəinki ölkəmizdə, bütün dünyada alimentin verilməsi vaxtı uzadılsın. Burada valideyn ilk növbədə ailənin qədrini bilməli və dağıtmamalıdır. İkincisi isə dağılmış ailədə valideyn əziyyət çəkməli və öz övladının arxasında dayanmağı özünə borc bilməlidir. Valideyn olmasa belə övladına pul vəsaiti ilə kömək etməlidir".

Mətanət Məmmədova təklif edir ki, alimentin verilmə müddəti 25 yaşa kimi artırılsa daha yaxşı olar:

"Biz də belə bir məsələ var. Amma bunun təhsil alan gənclər üçün şamil edilməsi daha məqsədəuyğundur. Gənclik dövründə təhsil alan və ailə quran gənclərimiz üçün ölkəmizdə təqdirəlayiq bir addım olardı. Bu insanlara valideynlik borcunun nə olduğunu daha yaxşı anlamağa imkan verir. Eyni zamanda bu ətrafdakı insanlara da nümunə olardı. Ailəni dağıtmamaq lazımdır. Ailə daxilində uşağa dəstək vermək lazımdır. Bu gün əgər valideyn övladına aliment ilə dəstək olursa, bunu ailə daxilində etmək olar. Bu nöqteyi-nəzərdən təklif edirəm ki, alimentin verilmə müddəti 25 yaşa qədər qaldırılsa daha təqdirəlayiq addım olar".

Sevda Səfərova

Telegramda izləyin