Avtobus qəzaları niyə artıb ? - AÇIQLAMA

Son zamanlar ölkədə avtobus qəzalarının sayı artıb. İnsanların daha sərfəli və güvənli deyə istifadə etdiyi bu nəqliyyat növü artıq təhlükəli bir hal alıb. Bəs görəsən qəzaların artmasına səbəb nədir ?

Mövzu ilə bağlı Sonxeber.az-a danışan nəqliyyat eksperti Elməddin Muradlı bildirib ki, qəzaların artmasına səbəb məsuliyyətsiz sürücülərdir:

"Avtobus qəzalarında sürücülərin böyük rolu var. Ciddi səhvlərə yol verirlər, diqqətsizlik edirlər. Bu da onların iş və istirahət rejimiylə, yaradılan şəraitlə bağlıdır. Müxtəlif səbəblər ola bilər. Ölkədə peşəkar sürücülərin sayı xeyli azalıb. Onlar Azərbaycanda az qazandıqları üçün xarici ölkələrə üz tuturlar. Daha yüksək maaş verdiyi üçün Polşada böyük bir Azərbaycanlı sürücü kütləsi formalaşıb. Əgər Azərbaycanda avtobus sürücüsü 8 saat iş qarşılığında 800-1000 manat maaş alırsa, Polşada 4000-5000 manat alır. Buna görə də xarici ölkələrə güclü axın var. Qalan sürücülərin də bir qismi intizamsızdırlar. Şirkətlər məcburi işi onlarla idarə eləməyə çalışır"

Onun sözlərinə görə bəzi sürücülər ölkədəki sürücü qıtlığından istifadə edirlər:

"Ölkədə peşəkar sürücü qıtlığı var. Buna görə də bəzi sürücülər bu vəziyyətdən istifadə edirlər. Çünki bilirlər ki, onları əvəz edən yoxdur. Onlar dərk etmirlər ki, hər hansı bir cinayət xarakterli hadisə törətsələr, həbs olunacaqlar. Ola bilər bəlkə də şirkət heç nə edə bilməz, amma dövlət, qanun edəcək. Bunu sürücülərə izah etmək lazımdır"

Bunun qarşısını almaq üçün hansı tədbirlər görülməlidir ?

"Şirkətlər sürücülərə ciddi təlimlər keçməlidir. Hesab edirəm ki, artıq avtobus sürücüləriylə bağlı ciddi tədbirlər görülməlidir. Onların daha yüksək əmək haqqı ilə təmin edilməsi, sosial vəziyyətlərinin yaxşılaşması və peşəkar sürücülərə üstünlük verilməsi bəlkə vəziyyəti müəyyən qədər yaxşılaşdıra bilər. Günah heç bir qurumda deyil, birbaşa sürücünün özündədir"

Çiçək Sadatova

Telegramda izləyin