Nəşi tapılan Fəridin atası: "Əsgərlikdən sonra iş qurmaq, bizə dəstək olmaq istəyirdi"

İki il əvvəl Laçında itkin düşən 2003-cü il təvəllüdlü hərbi qulluqçular - Fərid Məmmədov və Firdovsi Abdullayevin meyitləri Kəlbəcərdən tapılıb. Onlar yüksək dağlıq və çətin relyefli ərazidə hava şəraitinin qəfil dəyişməsi və çovğun səbəbindən istiqamətlərini itirərək itkin düşüblər.

Nəşi tapılan Fərid Məmmədovun atası Əjdər Məmmədov modern.az-a açıqlamasında bildirib ki, oğlunun sağ qayıdacağını gözləyirmiş:

"99% əmin idim ki, Fərid sağ-salamat evimizə qayıdacaq. İki ildir gözlərimiz yollarda idi. Allahın işi elə gətirdi ki, şəhid oldu".

Onun sözlərinə görə, Fəridin uşaqlığı çox çətin şəraitdə keçib:

"Fəridlə qardaşı çox zülmlə böyüyüblər. Fəridin uğurlu gələcəyi olacağını gözləyirdik. Əsgərlikdən sonra çox planları, arzuları var idi. İş qurmaq, bizə dəstək olmaq istəyirdi. Həmişə deyərdi ki, ata, mənə çəkdiyin əziyyətin qarşılığını verəcəyəm".

Məlumata əsasən, Fərid Məmmədovun cənazəsi sabah Ağdam şəhidlər xiyabanında dəfn olunacaq.

Xatırladaq ki, hərbçilərin itkin düşməsinə görə iki nəfər həbs olunub.

07 avqust, 20:21

İki il əvvəl Laçın rayonu ərazisində əlverişsiz hava şəraitində xidmət zamanı istiqaməti itirərək itkin düşmüş iki hərbi qulluqçudan birinin nəşi ailəsinə təhvil verilib.

APA xəbər verir ki, əsgər Fərid Əjdər oğlu Məmmədovun cənazəsi onun doğulub boya-başa çatdığı Ağdam rayonunun Orta Qərvənd kəndinə gətirilib.

Şəhidin vida mərasimi 8 avqust tarixində Ağdam rayonunun Quzanlı qəsəbəsində keçiriləcək. O, Quzanlı qəsəbə Şəhidlər xiyabanında dəfn ediləcək.

Telegramda izləyin

instagramda izləyin