Qaşım Maqomedov kimdir? - Qələbəsini doğulmamış övladına həsr edən idmançımız

Birinci vitse-prezident Mehriban Əliyeva Yay Olimpiya Oyunlarının gümüş mükafatçısı, Rusiya və Azərbaycan taekvondoçusu Qaşım Maqomedovla bağlı paylaşım edərək, təbrikini çatdırıb.

Lent.az "Bioqrafiya" rubrikasında Qaşım Maqomedov barədə məlumat verir.

- Qaşım Maqomedov harada və nə zaman anadan olub?

Qşim Maqomedoviç Maqomedov 22 sentyabr 1999-cu ildə Dağıstanın Şamilski rayonunda, Teletl kəndində anadan olub.

- Qaşım Maqomedov milliyətcə kimdir?

O milliyyətcə avardır.

- Qaşım Maqomedovun ilk məşqçisi kim olub?

Onun karyera yüksəlişində atasının böyük rolu olub. İlk müəllimi öz atası olub.

- Qaşım Maqomedovun idmanda başqa uğurları var?

Bəli. 2023-cü ildə Avropa çempionu adı alıb. 2012-ci ilin noyabrında kapitan olduğu Rusiya yeniyetmə milli komandasının üzvü kimi Xorvatiyada keçirilən beynəlxalq "A" dərəcəli turnirin qalibi olub. 2015-ci ildə gənclər arasında taekvondo üzrə Avropa çempionatında bürünc medal qazanıb. 2016-cı ilin noyabr ayının sonunda Kanadada keçirilən yeniyetmələr arasında dünya çempionatında Azərbaycan milli komandasının tərkibində finalda Cənubi Koreyalı Yun Çan-Hoya uduzaraq dünya çempionatının gümüş medalına sahib olub.

- Qaşim Maqomedov harada yaşayır?

2015-ci ilə qədər Rusiya çempionatlarında qələbələr qazanıb, sonra Azərbaycana köçüb. O, Azərbaycan taekvondo komandasının üzvüdür.

- Azərbaycana köçdükdən sonra hansı uğurları əldə edib?

2017-ci ilin yanvarında Bakıda Azərbaycan çempionu olub. 2017-ci ilin may ayında IV İslam Həmrəyliyi Oyunlarında gümüş medal qazanıb. 9 avqust 2022-ci ildə Konyada (Türkiyə) V İslam Həmrəyliyi Oyunlarının bürünc mükafatçısı olub.

2023-cü ilin fevralında Türkiyə Prezidentinin Taekvondo Kubokunda (İstanbul) qızıl medal qazanıb.

2023-cü ilin martında Hollandiya Açıq Çempionatında (Eindhoven) qızıl medal ,2023-cü ilin iyununda Krakovda (Polşa) keçirilən III Avropa Oyunlarında bürünc medal, 2023-cü ilin avqustunda 2023-cü il Avropa Taekvondo Çempionatında (Tallin, Estoniya) qızıl medal qazanıb. 2023-cü ilin oktyabrında Qatar Açıq Taekvondo Çempionatında (Doha) bürünc medalçı, 2023-cü ilin noyabrında Balkan Kuboku turnirində (Sarayevo, Bosniya və Herseqovina) 63 kq-a qədər çəki dərəcəsində qızıl medalçı olub.

2023-cü ilin dekabrında Vuxidə (Çin) Olimpiya çəki dərəcələrində Böyük Dəbilqə çempionatı turnirində qazanılmış qızıl medal ona 2024 Yay Olimpiya Oyunlarında iştirak etmək üçün lisenziya verib.

2024-cü ilin aprelində Belqradda keçirilən Avropa çempionatının bürünc mükafatçısı olub.

- Qaşım Maqomedov 2024-cü il Olimpiya Oyunlarında kiminlə mübarizə aparıb?

Maqomedov 2024-cü il Olimpiya Oyunlarında çıxışına irlandiyalı idmançı Cek Vulli üzərində qələbə ilə başlayıb. 1/4 finalda o, son dünya çempionatının bürünc mükafatçısı ispaniyalı Adrian Visentedən güclü olub, yarımfinalda isə hazırkı olimpiya çempionu italiyalı Vito Dell'Aquila üzərində qələbə qazanıb. 54 kq çəki dərəcəsində hazırkı dünya çempionu cənubi koreyalı Park Tae-cun ilə finalda Maqomedov döyüşün əvvəlində ayağından zədə alsa da, buna baxmayaraq mübarizəni davam etdirib. Nəticədə Maqomedov məğlub olub və gümüş medal qazanıb. Bu, Azərbaycanın taekvondo üzrə Olimpiya Oyunlarında dördüncü medalı və ilk gümüş medalı olub. Azərbaycan idmançıları sonuncu dəfə 2016-cı ildə Rio-de-Janeyroda keçirilən Olimpiadada medal qazanıblar.

- Qaşım Maqomedov neçə kiloqram çəki dərəcəsində döyüşüb?

Qaşım Maqomedov 58 kq çəki dərəcəsində mübarizə aparıb.

- Qaşım Maqomedov qələbəsi ilə bağlı hansı hissləri yaşayıb?

O, sosial şəbəkə hesabında videopaylaşımında azarkeşlərinə dəstəyə görə minnətdarlığını bildirib: "Hər rəyinizi oxuyuram və görürəm. Fiziki olaraq hamıya cavab verə bilmirəm. Hamınıza təbriklərə və dəstəyə görə təşəkkür edirəm. İnşallah, yavaş-yavaş hər birinizə cavab yazacam. Kimə cavab yazmıramsa üzrlü saymağını və məni başa düşməyini istəyirəm. Məni dəstəkləyən hər kəsə təşəkkür edirəm. Tribunalarda Azərbaycan bayraqları gördükcə daha çox sevinirdim".

İdmançı Azərbaycan Prezidenti İlham Əliyevə, Taekvondo Federasiyasının rəhbərliyinə və məşqçilərinə təşəkkür edib:
"Artıq 10 ildir ki, Azərbaycandayam. Prezident İlham Əliyev idman infrastrukturunun möhkəmləndirilməsi, yeniləşdirilməsi və bu sahənin inkişafına xüsusi diqqət yetirir. İlbəil idman sahəsində böyük inkişafın olduğunu görürük. Bütün Azərbaycan xalqına, məni tribunadan, televiziyadan izləyən və dəstəkləyən hər kəsə minnətdaram".

Qaşım Maqomedov finaldakı rəqibi, Cənubi Koreya təmsilçisi Park Taejoona məğlub olmasına da münasibət bildirib:

"Bir neçə ay öncə turnirdə koreyalı idmançı ilə qarşılaşmışdım və onu finalda məğlub etmişdim. Bugünkü döyüşdə isə özümü çox gözəl hiss edirdim. Əmin idim ki, tatamidə hər kəsi məğlub edib qızıl medalla Vətənə qayıdacağam. Amma təəssüf ki, zədə almağım buna imkan vermədi. Qismət gümüş idi. Baş həkim bildirdi ki, sümükdə sınıq ola bilər. Hazırda yoxlanış üçün xəstəxanaya gedəcəyik"- deyə o bildirib.

- Qaşım Maqomedov ailəlidir?

Bəli. "Gümüş medalı ailəmə, xüsusilə həyat yoldaşıma həsr edirəm. Biz ikinci övlad gözləyirik",- deyə o qeyd edib.

- Cüdoçular Los-Anceles-2028-ə titullarını qorumaq üçün gedəcəklərini deyiblər. Qaşım Maqomedov bu barədə nə düşünür?

"Qızıl medal hədəfim var. Uşaqlıqdan Olimpiadaya yollanmaq arzum idi. Kiçik yaşlarımda idmanla məşğul olarkən bu yarışı izləyərkən qeyri-adi hisslər keçirirdim. Bu arzumu həyata keçirmək mənə qismət oldu. Gümüşlə fəxr edirəm. Gəncəm, hələ qarşıda böyük uğurlar qazanmaq şansım var. Los-Ancelesdə bu mümkündür"- deyə o bildirib.

Telegramda izləyin