İşsizlik niyə artır ? - AÇIQLAMA

Hər il 30 mindən artıq gənc ali təhsilini başa vuraraq, əmək bazarına qoşulmağa can atır. Amma tam ali təhsil Azərbaycanda iş-güc sahibi olmaq üçün əsas deyil. Çox az qisim öz ixtisasına uyğun bir işlə təmin olunur. Əksəriyyət ya fərqli sahəyə yönəlir, ya da işsiz qalır.

Bəs gənclərin iş tapmaqda çətinlik çəkmələrinə səbəbi nədir ?

Mövzu ilə bağlı sosioloq Elçin Bayramlı Sonxeber.az -a açıqlamasında bildirb ki, gənclərin iş tapa bilməməsinin səbəbi ölkənin əmək bazarında olan boşluqlardır:

"Təəssüf ki, Azərbaycanda iş tapmaq çox çətindir. Son illərdə ölkədən xaricə iş məqsədi ilə gedənlərin sayı artıb. Onların böyük əksəriyyətini gənclər təşkil edir. Əmək bazarı mövcud tələbatın heç yarısını belə qarşılaya bilmir. Çünki bizdə iqtisadi diversifikasiya ciddi aparılmayıb və bir çox sahədə iqtisadi aktivlik zəifdir. Bir çox problem və maneələr var. Yeni iş yerlərinin yaranması və yeni bizneslərin qurulması üçün bürokratik əngəllər var. Mövcud iş yerlərində isə işçilərin işə qəbulunda tamam başqa metod və prinsiplər tətbiq olunur. Bu proseslərdə ədalətsizliklər var. Bundan başqa, mövcud olan iş yerlərində də əmək haqqı çox aşağıdır. Belə bir vəziyyətdə gənclər bu əmək haqqı ilə işləyib özlərinə həyat qura bilmirlər və məcburən xarici ölkələrə köçürlər. Bununla da vəziyyət getdikcə pisləşir. Biz beyinli, əmək qabiliyyətli, istedadlı gəncləri itiririk. Əhalinin işgüzar və gənc hissəsi azalır. Bu isə öz növbəsində gələcəkdə çox ciddi problemlər yaradacaq".

Dövlət bu halın qarşısını almaq üçün hansı tədbirləri görür ?

"Dövlət bununla bağlı hər hansı ciddi tədbir görmür. Mən hesab edirəm ki, görülən müəyyən işlər də effektiv deyil. Yaxşı olardı ki, kompleks şəklində dövlət proqramları həyata keçirilsin. Xüsusən iş yerlərinin yaradılması, azad rəqabət şəraitli kiçik bizneslərə, sahibkarlığa dəstək proqramları olmalıdır. Dövlət öz böyük investisiyaları hesabına fabrik və zavodların sayını artıra bilər. Təkcə Bakıda yox, rayonlarımızda da fabrik və zavodların sayı artırılmalıdır. Özünüməşğulluq proqramı çox zəifdir, buna da nəzarət etmək lazımdır. Bizim bunun üçün hədsiz mailiyyə imkanlarımız var. 75 milyardlıq strateji ehtiyatımız var, büdcə gəlirlərimiz çox yüksəkdir. Amma biz getdikcə görürük ki, işsizlik səviyyəsi daha da artır. Bu gün maaşlar artan qiymətlərin fonunda heç tək insanın xərclərini qarşılamağa kömək eləmir, nəinki ailə dolandırmaq. Bu halın qarşısını almaq üçün dövlət öz imkanları hesabına bir sıra ciddi tədbirlər görməlidir".
Çiçək Sadatova

Telegramda izləyin