AQTA işini görə bilmir: Yediyimiz niyə "zəhər" OLUR? - AÇIQLAMA

Göygöldə və Gəncədə zəhərlənmə hadisəsi baş verib. Hadisə Toğanalı kəndində yerləşən restonların birində qeydə alınıb. Göygöl Rayon Polis Şöbəsinin və Təcili Tibbi Yardım briqadasının əməkdaşları cəlb olunublar. Zəhərlənmə "Ağ ayı", "Xan yurdu" və "Araz" iaşə obyektlərində, eyni zamanda mərasim evində qeydə alınıb.

TƏBİB-dən bildirilib ki, zəhərlənənlər arasında vəziyyətləri ağır olan yoxdur. Müvafiq yardım göstərildikdən sonra hissə-hissə evə buraxılırlar. Hazırda 96 müraciətdən 46 nəfər stasionarda yardım alır. Vəziyyətləri orta-ağır qiymətləndirilir.

Ölkəmizin bir sıra zonalarında müxtəlif qidalardan zəhərlənmə halları müşahidə olunub. Bunlardan ən yadda qalanı Zaqatalada baş verən zəhərlənmə hadisəsi idi. Bəs kütləvi zəhərlənmələrin səbəbi nə ilə bağlıdır? Son baş verən hadisədən sonra adları çəkilən obyektlər bağlana bilərmi?

Mövzunu Sonxeber.az-a şərh edən Azad İstehlakçılar Birliyinin sədri Eyyub Hüseynov bildirib ki, bu məsələ təsadüfi deyil. Hər yerdə kütləvi zəhərlənmə mövcuddur və statistika Azərbaycanda ciddi şəkildə gizlədilir:

"Ümumilikdə rəqəmlər 700 dəfə az göstərilir. Dünya ölkələri arasında azərbaycanlılar uzunömürlülüyə görə 190 ölkə arasından 115-ci yerdə dayanır. Hər il ölkəmizin müxtəlif regionlarına gedir və vəziyyəti müşahidə edirəm. Dəfələrlə Gəncə və Göygöl istiqamətində yerləşən ictimai-iaşə obyektləri ilə bağlı tənqidi fikirlərim olub. Minlərlə çoxsahəli iaşə obyektləri var. Mən bir yerə çay içmək üçün gedəndə ilk növbədə qab yuyulan yerə baxıram. Həmin zonada yerləşən obyektdə qadın kirli qabları kirli dəsmal ilə təmizləyirdi. Elə yerdə də oturmaq olmaz. O istiqamətdə kiçik bir çay axır. Çayın bir tərəfində qab yuyulur, üz qırxılır. Orada ciddi antisanitar vəziyyət yaranıb. Hətta yaxşı işləmək istəyən ictimai-iaşə obyektləri belə normal fəaliyyət göstərə bilməz. Çox ağır bir vəziyyət yaranıb. Ölkənin başqa yerlərində buna bənzər vəziyyət mövcuddur. Şimal zonasında təxminən buna uyğun vəziyyət müşahidə olunur".

Ekspertin sözlərinə görə, zəhərlənmələrin baş vermə səbəbi ölkədə istehlakçı hüquqları siyasəti yox dərəcəsində olması ilə əlaqədardır:

"AQTA-nın əsasnaməsi onların fəal iş aparmasına imkan vermir. Yoxlama keçirmək üçün uzun bir prosedur lazımdır. Dəfələrlə demişik ki, bu prosedur götürülməlidir. AQTA-nın əsasnaməsində ciddi dəyişiklik edilməlidir. Statistikanın gizlədilməsində AQTA özü fəal iştirak edir. Çünki zəhərlənənlər və bu zəhərlənmələrdən ölən insanların sayı bu qurumun saytında göstərilir. AQTA-nın özünün qida təhlükəsizliyinin təmin olunmasına dair dövlət strategiyası sənədinin qlobal meyillər bölməsində göstərilir ki, dünya hər il 10 nəfərdən biri zəhərlənir. Amma biz də az göstərilir. Uşaqların ölümü də gizlədilir. Artıq bunlara bir son qoyulmalıdır. Bütün bunlar onu göstərir ki, AQTA-nın işini fəallaşdırmaq lazımdır. Belə yerlər müvəqqəti bağlana bilər. Amma AQTA bütün bu işlərin öhdəsindən gələ bilmir. Çünki antisanitariya ölkə ərazisində geniş yayılıb.

Sevda Səfərova

Telegramda izləyin