"Azərbaycanda İsrailə aid hərbi bazanın olması ermənipərəst qüvvələrin uydurduğu yalandır" - DEPUTAT

"Azərbaycanda İsrailə aid nə hərbi baza, nə də silah-sursat yoxdur".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, ilk olaraq İngiltərə mətbuatı İran Prezidenti Məsud Pezeşkianın SEPAH-a Azərbaycandakı İsrail obyektlərinə hücum etmək barədə təklifindən yazdı:

"Amma nə İran hökuməti, nə də Pezeşkian belə bir bəyanat verildiyini təsdiq etmədi. Bu gün bəzi qüvvələr Azərbaycan-İran arasında müansibətləri yenidən gərginləşdirməyə çalışır. Görünür, Pezeşkianın azərbaycanlı olması və seçki prosesində azərbaycançılıqla bağlı müsbət fikirlər səsləndirməsi həmin qüvvələri narahat etməyə başlayıb. Məhz buna görə də Azərbaycan-İran arasında nifaq, problem yaratmaq üçün onun adından yalan informasiyalar yazmağa başlayıblar. Düzdür, Pezeşkianın bu fikirələri səsləndirməsi ilə bağlı dəqiq məlumat yoxdur. Amma çox guman ki, Pezeşkianın adından bu cür xəbərlər yayaraq Azərbaycan-İran münasibətlərini daha da gərginləşdirməyə çalşırlar".

Deputat vurğulayıb ki, Azərbaycanda İsrailə aid heç bir hərbi baza yoxdur:

"Azərbaycan dəfələrlə İrana sual veribki, sizin əlinizdə İsrailin Azərbaycanda hərbi bazasının olması barədə dəqiq rəsmi fakt varmı? Varsa belə bir fakt, ortaya qoyun.

Azərbaycanda İsrailə aid hərbi bazanın olması yalanı ermənipərəst qüvvələrin uydurduğu yalandan və ölkəmizə qarşı yönələn şər-böhtan kampaniyasından başqa bir şey deyil. Bu açıq-aşkar Azərbaycan-İran münasibətlərini gərginləşdirmək üçün atılan addımdır. Hər halda İran rəhbərliyi oynanılan bu oyunların fərqindədir. Biz özmüz də ölkəmizə qarşı aparılan şər-böhtan xarakterli kampaniyalarda bir az diqqətli olmalıyıq".

Telegramda izləyin