"Razi Nurullayevdə bir az tələskənlik olub, belə şeylərdən başqa kampaniyalarda istifadə etmək olar" - AÇIQLAMA

Milli Məclisin VI çağırış deputatı, 81 saylı İmişli seçki dairəsinin deputatlığa namizədi, Milli Cəbhə Partiyasının sədri Razi Nurullayevin İmişlidə müvəqqəti yerləşdiyi evdə çəkdiyi görüntülər geniş müzakirə yaradıb. Onun yataq otağını seçicilərinə nümayiş etdirməsi, yatağında idman etməsi, paltarlarını sərgiləməsi bir çoxlarının ironiyasına tuş gəlib.

Pravda.az-a fikirlərini bölüşən sosioloq Əhməd Qəşəmoğlu isə deyib ki, Razi Nurullayevi tənqid etmək istəmir.

"Seçki ərəfəsində bir çox deputatlığa namizədlər və onların texnoloqları tələskənliyə yol verirlər. 35 ildir, seçki proseslərində iştirak edən adamam, bu məsələlərlə bağlı xeyli təcrübəm var. Təbliğat-təşviqat aparanlara tövsiyə edirəm ki, seçki ərəfəsində elə metodlara əl atmaq lazımdır, seçicilər arasında gərginlik yaratmasın, suallar ortaya çıxarmasın. Eksperimentlər aparmaq yolverilməzdir. Bəzən bizimkilər oxuyurlar ki, İtaliyada, Yunanıstanda, yaxud Yaponiyada hansısa namizəd bu metoddan istifadə edib. O ölkələrdə tamam başqa insanlardır. Bizim insanların üstünlük verdikləri dəyərlər sistemi var. Seçki ərəfəsində texnoloqlar da çalışmalıdırlar ki, insanlar namizədin bir deputat kimi üstün keyfiyyətləri barədə ətraflı məlumat alsınlar. Deputatın vəzifəsi ən çox Milli Məclisdə yüksək səviyyəli qanunların qəbul edilməsi sahəsində çalışmaq, ölkəmizi xarici ölkələrdə, beynəlxalq tədbirlərdə təmsil etməkdir. Deputat öz dairəsi, ölkəmiz üçün sosial problemlərin həllində gücü çatan köməkliyi etməkdir. İnsanlara bu istiqamətdə məlumat vermək lazımdır ki, namizədin hansı sahədə qabiliyyətə malikdir. Razi Nurullayevdə bir az tələskənlik olub. Belə şeylərdən adətən deputatlıqda yox, başqa kampaniyalarda istifadə etmək olar. Deputatlığa namizədlərin kampaniyasında daha məxsusi metodlara böyük ehtiyac var. Bu metodlar namizədin daha çox deputat kimi keyfiyyətini göstərməlidir", - o bildirib.

Telegramda izləyin