Nəticəsi ağır OLA BİLƏR: Ermənistan Naxçıvandan niyə ƏL ÇƏKMİR?

Ermənistan yenə də, son 2 gündür Naxçıvan istiqamətində atəşkəsi pozur. Avqustun 16-sı saat 3:20 radələrində Ermənistan silahlı qüvvələrinin bölmələri Azərbaycan Ordusunun Naxçıvan Muxtar Respublikasının Sədərək rayonu istiqamətində yerləşən mövqelərini atıcı silahlardan atəşə tutub. Bu barədə Azərbaycan Müdafiə Nazirliyi məlumat yayıb. Qeyd olunub ki, bölmələrimirz tərəfindən qeyd olunan istiqamətdə adekvat cavab tədbirləri görülüb.

Naxçıvan Ermənistanın ən çox təxribat törətdiyi ərazilərimizdəndir. Danışıqlar prosesinin davam etdiyi bir vaxtda Ermənistanın Naxçıvan istiqamətində atəşkəsi pozmağı suallar yaradır. Xüsusilə, COP29-a az qalan bir vaxtda Ermənistanın qərb koalisiyası tərəfindən silahlanmaları onların əsl üzünü ortaya qoyur.

Ermənistan sülh müqaviləsi istiqamətində addımlar atmaq əvəzinə, niyə təxribat törətməkdə maraqlıdır?

Ermənistan Silahlı qüvvələri son iki gündə Naxçıvan istiqamətində atəşkəsin pozulmasını həyata keçiriblər. Dünən Ordubad rayonunun Gəncə kəndi istiqamətində yerləşən şərti sərhəddəki mövqelərimiz atəşə tutulub. Bu gün isə Sədərək rayonunda yerləşən mövqelərimiz atəşə alınıb:

"Ermənistan Silahlı Qüvvələri və onları dəstəkləyən qərb koalisiyası qüvvələrinin cəsarətləndirilməsi fonunda yeni gərginlik yaratmaq niyyəti var. Xüsusilə COP29-a qədər şərti sərhəddə hər hansı mövqelərimizin atəşə tutulması nəticəsində Azərbaycanı yeni münaqişəyə təhrik etmək planları var. Bu ərazilər Zəngəzur koridorunun keçə biləcəyi ərazilər olduğu üçün sanki bu gərginliyin yaranmasında Azərbaycanın maraqlı olduğunu göstərməyə çalışırlar. Bu səbəbdən Ermənistanın silahlanması fonunda, həm də ABŞ-nin təlimləri keçirməsi , hərbi təyyarələrin və şəxsi heyətin Ermənistana daşınması ilə Ermənistan sülh sazişindən uzaqlaşaraq yeni münaqişəyə Azərbaycanı təhrik etməyə çalışırlar".

Ekspert vurğulayıb ki, Ermənistan artıq nəticələrə hazır olmalıdır. Atəşkəs pozulursa, Azərbaycan Silahlı Qüvvələri lokal və taktiki səviyyədə adekvat cavab verirlər. Ermənistan ağlını başına yığmalıdır. Əks təqdirdə cavablar Ermənistan üçün qorxulu ola bilər:

"Yaxın tarixdə baş verən təcrübələr ilə Ermənistan bunu anlamalıdır. 44 günlük müharibə və lokal xarakterli antiterror tədbirlərində Ermənistan ciddi zərbələr aldı. Ermənistan bundan dərs çıxararaq atəşkəsin pozulması hallarına bir son verməlidir. Onlar daha çox bir an öncə sülh sazişinin bağlanmasında maraqlı olmalıdır. Ermənistanın sülh müqaviləsini bağlanmamasına sövq edənlər də var. Çünki gərginliyin bütün bölgələrdə artdığını görürük. Onların Ermənistan ərazisi üzərindən Cənubi Qafqazda yeni müharibə çıxartmaq planları var. Düşünürəm ki, Azərbaycan tərəfi bunun fərqindədir. Bu səbəbdən bizim səbrli davranmağımızın əsas səbəblərindən biri də qarşı tərəfin çirkli niyyətlərindən məlumatlı olmağımızdır".

Xatırladaq ki, avqustun 15-i saat 18:10-da Azərbaycan Ordusunun Naxçıvan Muxtar Respublikasının Ordubad rayonunun Gənzə yaşayış məntəqəsi istiqamətində yerləşən mövqeləri Ermənistan silahlı qüvvələrinin bölmələri tərəfindən atıcı silahlardan atəşə tutulmuşdu.

Sevda Səfərova

Telegramda izləyin