Sosial medianın zərərləri nələrdir ? - AÇIQLAMA

Sosial media sayəsində ikitərəfli qarşılıqlı əlaqə, paylaşma və insanların öz məzmunlarını istehsal etmələri mümkün olmuşdur. Veb saytlar və tətbiqlər sayəsində istifadəçilər bir-biri ilə məlumat paylaşa bilir və hər kəs istədiyi məlumatı əldə edə bilir. Bununla belə, sosial media təkcə fərdlər üçün deyil, həm də qurumların marketinq strategiyalarında mühüm yer tutur. İstifadəçilər internetə çıxışı olan hər yerdə, heç bir vaxt məhdudiyyəti olmadan və yalnız özləri ilə heç vaxt tərk etmədikləri mobil cihazları vasitəsilə sosial mediada paylaşa bilirlər. Bəs texnologiyanın inkişafının yeniliklərlə bərabər bizə gətirdiyi mənfi və zərərli təsirlərdən nə dərəcədə xəbərdarıq ? Bildiyimiz kimi texnologiya günü-gündən inkişaf etdikcə insanların komputerə, mobil telefonlara marağı daha da artır. Gənclərin sosial şəbəkələrdə həddindən artıq vaxt keçirməsi ciddi sağlamlıq problemlərinə, sosial-mədəni eroziyaya və rejim pozuntusuna səbəb olur. Xüsusilə gənc qrup dediyimiz yeniyetmələrdə ciddi psixoloji deformasiyaya səbəb olur.

Sosial medianın insanların gündəlik həyatlarına mənfi təsirləri nələrdir?

Mövzu ilə bağlı psixoloq Gülər Məmmədli Sonxeber.az -a açıqlamasında bildirib ki, sosial medianın həddindən artıq istifadəsi insanları reallıqdan uzaqlaşdırır:

"Sosial media yeniyetmələrdə texniki bacarıqları artıra bilsə də, sosial bacarıqları və ünsiyyəti azalda bilər və bu sahədə qarşılaşdıqları bəzi mənfi təsirlər belə psixoloji travmalar yarada bilər. Həssaslıq, müqayisə və rəqabət çatışmazlığı özünəinam və sosial narahatlıq kimi psixoloji problemlərə yol açır; Virtuallaşdırılmış gözəllik qavrayışı gənclərdə yemək pozğunluğu kimi təhlükələr yaradır. Çox vaxt sərf edən və asılılıq yaradan sosial medianın istifadəsi, gənclərin həyatına yuxusuzluq, ailəsinə daha az vaxt ayırma və real həyata marağının itməsi kimi bir sıra mənfiliklər əlavə edir. Hər şeydən əvvəl sosial medianın həddindən artıq istifadəsi reallığın təhrif edilməsinə səbəb ola bilər. Qarşımıza çıxan yazılar, fotolar və videolar hər kəsin həyatının mükəmməl, xoşbəxtlik, uğur və macəra ilə dolu olduğu illüziyası yaradır. Başqalarının həyatının ideallaşdırılmış versiyalarına davamlı olaraq məruz qalmaq isə bizi öz reallığımızdan qeyri-adekvat və narazı hiss etdirə bilir. Buna görə də insanlarda gördüklərini təkrarlamaq istəyi yaranır. Onlar sosial şəbəkələrdə reklam olunan həyat tərzinə, geyimlərə, gəzintilərə aludəçi olurlar. Daha ciddi işlərə zaman sərf etmədiklərindən öz boşluqlarını doldurmaq üçün bu yola meyillənirlər. Gördükləri hər geyimi yaraşsa da, yaraşmasa da geyinmək, əslində bəyənmədikləri restoranda dadını heç sevməsə də hamı tərifləyir deyə yemək və.s. sanki bir növ manipulyaysiyaya uğrayırlar. Çünki sosial mediada hər kəs özünü olduğu kimi yox, olmaq istədiyi kimi göstərir. Xüsusən gənc yaşlarda ifrat sosial media istifadəsi zamanı daimi müqayisələr, əldən qaçırmaq qorxusu və mükəmməl bir onlayn şəxsiyyət təqdim etmək təzyiqi zehni rifahımıza zərər verə bilər. Əgər insanlar özlərini adekvat, rasional qəbul etsələr, onlar bu kimi şeylərə enerji sərf etməzlər. Öz həyatlarını olduğu kimi qəbul edər və həqiqətən xoşbəxt olmağa çalışarlar, xoşbəxt görünməyə yox"

Çiçək Sadatova

Telegramda izləyin