Azərbaycanda falçıya gedənlər CƏRİMƏLƏNSİN - TƏKLİF

Tacikistanda falçılıqla məşğul olan şəxslərin xidmətlərindən istifadə edənlər cəzalandırılacaq. Bu barədə ölkənin Daxili İşlər Nazirliyi məlumat yayıb. Bildirilib ki, araşdırmaların nəticəsində mütəmadi olaraq müəyyən məbləğ qarşılığında bu cür şəxslərə müraciət edən 150 nəfərlə bağlı müvafiq tədbirlər görülüb.

Göründüyü kimi, falçı dələduzluğu Azərbaycanda geniş yayılmış və bir o qədər ciddiyə alınmayan mövcuddur. Bizim cəmiyyətin hər küncündə demək olar ki, bir falçı var. Bəziləri kartlarda, bəziləri isə qəhvə fincanının dibində gələcəyimizi oxumaqla məşğuldurlar. Bu işlə məşğul olanlar yalnız qəhvə fincanının dibinə baxmaqla qalmırlar. Onlara müraciət edənlərin bank hesablarına yaxşı baxış keçirirlər. Bəs sözügedən tədbirlər Azərbaycanda tətbiq edilə bilərmi?

Mövzu ilə bağlı Sonxeber.az-a danışan sosioloq Elçin Bayramlı deyib ki, sözügedən tədbirlər təqdirəlayiqdir. Dünyanın bir çox mədəni ölkələrində bu qayda tətbiq olunur:

"Ölkəmizdə savadsız və cahil olan kütlə üçün bu falçılar çox təhlükəlidir. Milyonlarla insan talanır, aldadılır. Həmin insanların başında müxtəlif cür problemlər açılır. Bu biznesdən artıq milyonlarla pul qazanılır. Hər bir dövlətin ən ümdə vəzifəsi əhalinin sağlamlığı və təhlükəsizliyini qorumaqdır. Ona görə də dövlət bu məsələlərdə konkret qadağalar və nəzarət sistemi qurmalıdır. Son dövrlərdə bu məsələ ilə bağlı insanlar öz cızığından çıxıb. Saxta azadlıq altında kim nə istəyir eləmək niyyətindədir. Kapitalizmin ən çirkin formaları, dünyada olan bütün fırıldaqçılıq cəmiyyətimizdə inkişaf edir. Yalançılıq, dələduz, quldurluq və hər cür əməllər törədilir. Bu falçılıq onların başında gələnlərdən biridir".

Sosioloqun sözlərinə görə, sərt nəzarət mexanizmi qurulmalıdır və belə şəxslər əmlakları müsadirə edilərək həbs olunmalıdır:

"İnsanlardan alınan bütün pullar geri qaytarılmalıdır. Cadugərlik, falçılıq və digər işlər ilə məşğul olan şəxslər isə aşkar olunmalı, zərərsizləşdirilməlidir. Dərindən baxdıqda bu mövzular bir növ elmi kateqoriyaya aiddir. Yəni ekstrasens insanlar da var. Eyni zamanda ekstra-bioloji funksiyalara malik olanlar var. Bunlar elmi-tədqiqat obyektidir. Bununla mütəxəssislər və alimlər məşğul olur. Bu dələduzların məşğul ola biləcəyi sahə deyil. Elmi şəkildə öyrənilir və dövlət nəzarəti altında institutlar məşğul olur. Falçılıq və digər dələduzluq əməlləri bizim cəmiyyətimizin sisteminə ağır zərbə vurur. İnsanların ailələri dağılır, pulları əlindən alınır və camaatı borca, kreditə salırlar. Bu açıq şəkildə terrordur və onlara loyal münasibət niyə göstərilir? Dövlət niyə buna göz yummalıdır? Bunun qarşısını almağın yoludur. Səbəb isə bir çox insanların cahil və savadsız olmasıdır".

Qeyd edək ki, bundan əlavə nazirlik həmin insanlar haqqında informasiyanın yer alacağı məlumat bazasının yaradılmasına qərar verib.

Telegramda izləyin