Uşaqlarına sosial mediadan istifadə etməyi icazə verən valideyn yüksək məbləğdə CƏRİMƏLƏNSİN - TƏKLİF

Avstraliya 14 yaşdan kiçik uşaqların sosial mediadan istifadəsini qadağan etməyə hazırlaşır. Hesabatda sosial medianın uşaqların psixi sağlamlığına mənfi təsirləri və asılılıq yaradan xüsusiyyətləri vurğulanıb. Qanun layihəsinə əsasən, 14 yaşından kiçik uşaqlar sosial media platformalarına valideyn razılığı olmadan daxil ola bilməyəcəklər. Əgər uşaqlar bu platformalarda qanunsuz olaraq hesab açarsa, sosial media şirkətləri cərimələnə bilər.

Bəs sözügedən qanun layihəsinin Azərbaycanda tətbiq edilməsinə ehtiyac varmı? Mövzunu Sonxeber.az-a danışan sosioloq Mətanət Məmmədova deyib ki, nəinki Avstraliyada, bütün dünyada 14 yaşdan kiçik uşaqların sosial şəbəkələrdən istifadəsi qadağan edilməlidir və bu bütün dünyanın gələcəyinin xilası deməkdir:

"Bu dünyaya böyük bir mesajdır. Uşaqlar bizim gələcəyimizdir. Azərbaycanda buna qoşularsa gələcəyimizi xilas etmiş olarıq. Məlumdur ki, sosial şəbəkələrdə valideynlər övladlarını reklam edirlər. Onların şirin dilindən istifadə edərək danışdırır, uşaqların videolarını paylaşırlar. Bütün bunlar bizim uşaqların gələcəyini məhv edən amillərdir. Sosial şəbəkələrə bütün dünya baxır. Uşaqlarımızı bu addımlarla sanki onları alverə çıxarmış oluruq. Onlardan bir növ alver kimi istifadə etmiş oluruq. Əksər valideynlər öz rahatlıqları üçün telefonları övladlarına verirlər. Biz böyüklər nəsə bir məlumat oxuduğumuz vaxt reklamlarla qarşılaşırıq. Uşaqlarda telefonlarda cizgi filmə baxanda, oyun oynadıqda həmin reklamları görürlər. Bu gün uşaqlarımız niyə həmin reklamları görməlidir?"

Sosioloqun sözlərinə görə, sosial şəbəkələrdə və orada olan reklamlar uşaqların dünyasına, yaşına zərbə vurur, uşaqları parlaq yox, çirkin bir gələcəyə hazırlayır:

"Ona görə də uşaqların birmənalı şəkildə mediadan, sosial şəbəkədən uzaq tutulması gözəl bir fikirdir. Biz nə qədər istəsək və maarifləndirmə aparsaq da valideynlər, uşaqlar bu əməldən əl çəkmirlər. Sosial şəbəkələrdə uşaqlar təqiblərə məruz. Onlar böyüyəndən sonra aralarında həmin videolara görə xəcalət çəkənlər olur. Görünür ki, dünyada baş verən hadisələr valideynlərə təsir etmir. 14 yaşına qədər uşağın sosial şəbəkədə olmasına birbaşa valideyn cavabdehdir. Smartfon telefonları uşaqları başından etmək üçün əlinə verməsələr belə hallar olmaz. Nəinki 14 yaş, 6 aylıq, 1 yaşında olan uşaqların əlində telefon görmək mümkündür. Saya biləcəyimiz nümunələr çoxdur. Həmin valideynlər bu əməllərinə görə böyük məbləğdə cərimələnməlidir. Bu məsələ qanun layihələrinə daxil olmalıdır. Qadağan olunması ilə birlikdə, bu əmələ əl atan valideynlərin cərimələnməsinin tərəfdarıyam".

Sevda Səfərova

Telegramda izləyin