Odlu silahlarla törədilən cinayətlərin qarşısını necə almaq olar? - AÇIQLAMA

Bir müddət əvvəl DİN əhaliyə qanunsuz odlu silahları təhvil vermələri ilə bağlı çağırış etmişdi. Silahlarını təhvil verən vətəndaşlarla yanaşı verməyənlər də az deyildi. Son günlər ölkədə baş verən silahlı insidentlər də bunun sübutudur. Bəs görəsən vətəndaşların qanunsuz silahlarını təhvil vermələri üçün daha hansı addımlar atılmalıdır?

Mövzu ilə bağlı "Polisə Dəstək" İctimai Birliyinin sədri, təqaüddə olan polis polkovniki Şəmsəddin Əliyev Sonxeber.az -a açıqlamasında bildirib ki, əgər görülən tədbirlər bir nəticə vermirsə, cəzalar sərtləşdirilməlidir:

"Bu vaxta qədər Daxili Işlər Nazirliyi tərəfindən qanunsuz saxlanan odlu silahların yığılması ilə bağlı əhaliyə çoxlu müraciətlər, çağırışlar edilib. Bu sahədə çoxsaylı maarifləndirmə xarakterli tədbirlər keçirilib. Bu addımlar nəticəsində hətta valideyinindən miras qalan qanuni odlu silahları da təhvil verənlər oldu. Bu baxımdan cinayətlərin statistikasında odlu silahlarla törədilənlərin sayı nisbətən azalıb.

Amma bu belə hallar heç yaşanmır demək deyil. Bunun səbəbi cəmiyyətimizdə hələ də müəyyən fərdlərin çoban təfəkküründə olmasıdır. İnsanlar silahı özlərinə dost kimi qəbul edirlər. Düşünürlər ki, nə vaxtsa ona ehtiyac yaranacaq. Bu tamamilə yanlış bir düşüncə tərzidir. Azərbaycanı bu gün Amerikanın hər hansı bir ştatı ilə müqayisə etmək olmaz. Orada axşam saat 8-dən sonra bəzi küçələrdə ümumiyyətlə gəzmək təhlükəlidir. Hər an quldurluğa, soyğunçuluğa və digər ağır cinayətlərə məruz qala bilərsən. Bizimsə belə böyük problemlərimiz yoxdur".

Şəmsəddin Əliyev[ vurğulayıb ki, Bakının ətraf kəndlərində 2020-ci ildən və antiterror əməliyyatından sonra ordudan təxris olunmuş şəxslərdə silahların qalması ehtimalı var idi:

"Amma onlar da artıq yığılıb. Əhali silahların təhvil verilməsi çağırışına hörmətlə yanaşdı. Amma cəmiyyəti ağır cinayətlərdən sığortalamaq da mümkün deyil. İnsan olan hər yerdə hər bir hadisə gözləniləndir. Biz bu məsələyə başqa aspektdən yanaşmalıyıq. Əgər həyata keçirilən çoxsaylı tədbirlər, əhaliyə edilən çağırışlar nəticə vermirsə, yenə qanunsuz saxlanılan odlu silahlarla ağır cinayətlər törədilirsə, deməli cəzalar ağırlaşdırılmalıdır. Cinayət Məcəlləsinin müvafiq maddələri üzrə sanksiyanın sərtləşdirilməsinə ehtiyac var.

Bundan əlavə olaraq, bu məsələnin sadəcə xəbər saytlarında deyil, televiziya kanallarında da işıqlandırılması cəmiyyətin maariflənməsində mühim rol oynaya bilər. Çox istərdim ki televiziya kanalları bu kimi məsələlərə toxunsun. Çünki televiziya izləyiciləri daha çoxdur"

Çiçək Sadatova

Telegramda izləyin