Bakıda aeroportdan adam OĞURLUĞU - Cinayətin TƏFƏRRÜATI

Ötən il Bakıda baş vermiş adam oğurluğu cinayəti ilə bağlı təfərrüat bəlli olub.

"Qafqazinfo"nun məlumatına görə, cinayət işində həm təqsirləndirilənlər, həm də zərərçəkənlər pakistanlılar olublar.

Belə ki, Pakistan vətəndaşları - Abbas Muhammad İbraheem Muhammad, Muzammil Muhammad Boota Muhammad və Mukhtar Mohsin Ahmad Mukhtar qruplaşma təşkil edərək həmyerlilərini oğurlayıblar.

Onlar turist qismində Azərbaycana səfər edən Khushnam Ali Muhammad, Shahzad Ali və onun qardaş oğlunu Riaz Avanı qaçırıblar.

Plana əsasən, ötən ilin aprelində Mukhtar Mohsin Heydər Əliyev Beynəlxalq Aeroportuna gələrək təyyarədən düşən zərərçəkmişləri gözləyib. Çıxış qapısına isə birinci Shahzad Ali çıxıb. Bu zaman Mukhtar Mohsin ona yaxınlaşaraq kömək etmək istəyirmiş kimi görünüb. O, əvvəlcədən sifariş verdiyi hotelə çatdırmaq adı ilə Shahzad Alini aldadıb. Daha sonra özünün sifariş verdiyi taksiyə əyləşərək qrup üzvləri ilə birlikdə kirayə yaşadığı Bakı şəhəri, Binəqədi rayonu, Azadlıq prospektindəki evə gəlib. Qrup üzvləri burada Shahzad Alini döyərək onun əl və ayaqlarını bağlayıblar.

Zərərçəkmişin digər yaxınlarını oğurlamaq üçün isə onlara zəng ediblər. Bu zaman kağız kəsən bıçağı Shahzad Alinin boğazına dirəyən cinayətkarlar, digərlərini də evə çağıraraq onların da əl və ayaqlarını bağlayıblar.

Cinayətkarlar daha sonra oğurlanmış şəxslərin yaxınına zəng edərək 20 min dollar tələb ediblər. Bu pul Pakistanda cinayətkar qruplaşmaya yaxın olan naməlum şəxsə verilib.

Pulu əldə etmələrinə baxmayaraq, girov saxlanılan şəxslər azad edilməyiblər. Maraqlıdır ki, zərərçəkmişlər cinayətkarların əlindən özləri xilas olublar. Belə ki, Khushnam Ali və Shahzad Ali qrup üzvlərinin mənzilin digər otağında başlarının qarışıq olmalarından istifadə edərək əl və ayaqlarını kəndirdən azad edib və mənzilin pəncərəsindən çıxaraq qonşu mənzilə keçərək xilas olublar.

Qeyd edək ki, təqsirləndirilən şəxslərin məhkəməsi ötən ay başa çatıb. Bakı Ağır Cinayətlər Məhkəməsinin hökmünə əsasən, qruplaşma üzvlərinin hər biri 11 il müddətinə azadlıqdan məhrum ediliblər.

Telegramda izləyin

instagramda izləyin