Video üçün ağzına kobra qoyması ölümü ilə nəticələndi - VİDEO

Hindistanın Telangana əyalətində sosial media üçün əlində kobra ilanı tutaraq video çəkən 20 yaşlı Şiva Raju kobranın sancması nəticəsində ölüb.

Sonxeber.az xarici mediya istinadən xəbər verir ki, atasından ilan tutmağı öyrənən Racu kənd sakininin tapdığı kobranı tutub. Cümə axşamı ilanla videosunu lentə alan gənc riskli addım ataraq kobranın başını ağzına qoyub. Bu vaxt kobra Racunu dişləyib.

Racu hadisədən sonra evə qayıdıb və vəziyyəti ailəsinə çatdırıb. Ailə üzvləri dərhal gənci yerli xəstəxanaya çatdırıblar. Lakin bütün tibbi müdaxilələrə baxmayaraq, onu xilas etmək mümkün olmayıb və o, ilan sancması nəticəsində dünyasını dəyişib.

Bu faciəvi hadisə sosial media üçün təhlükəli məzmun istehsalının potensial riskləri ilə bağlı narahatlıqları artırıb. Mütəxəssislər xüsusilə gənclərə xəbərdarlıq edir ki, izləyici qazanmaq və ya populyarlıq naminə həyati təhlükə yaradan hərəkətlərdən çəkinsinlər.

Yerli hakimiyyət orqanları oxşar hadisələrin qarşısını almaq üçün ictimai maarifləndirmə işləri aparacaqlarını açıqlayıb. Bundan əlavə, ilan kimi təhlükəli heyvanlarla təmasda daha sərt qaydaların tətbiqi planlaşdırılır.

Telegramda izləyin