Paytaxt ərazisində özünü DİN işçisi kimi təqdim edən şəxslər peyda OLUB - RƏSMİ AÇIQLAMA

Paytaxt ərazisində mənzillərin ətrafında özlərini Daxili İşlər Nazirliyinin işçisi kimi təqdim edən bir qrup şəxslər peyda olub.

Sonxeber.az xəbər verir ki, bu barədə məlumat "WhatsApp" platformasında yayılıb. Bildirilib ki, həmin şəxslər Daxili İşlər Nazirliyinin fərqlənmə nişanı olan sənəd və blankları gəzdirir. Eyni zamanda qarşıdan gələn "əhalinin siyahıyaalınması" ərəfəsində bütün sakinlərdə etibarlı şəxsiyyət vəsiqələrinin olub-olmadığını yoxlamalı və biometrikadan keçməli olduqlarını iddia edirlər:

"Daxili İşlər Nazirliyinin formasını geyə bilərlər. Onlar sizin fotoşəkilinizi, barmaq izini "bir sxemin bir hissəsi kimi" çəkmək istədiklərini bildirirlər. Əllərində noutbuk, biometrik cihaz və sakinlərin siyahısı var. Bu siyahını göstərirlər və bütün bu məlumatları tələb edirlər. Nəzərinizə çatdırırıq ki, hökumət tərəfindən belə təşəbbüslər yoxdur. Zəhmət olmasa heç bir biometrik məlumat verməyin! Qapını açmayın və evə girmək qadağandır! Oğurluq və saxtakarlıq edə bilərlər. Dövlət qurumlarında rəsmi prosedurlar olmadan heç bir məlumat verməyin. Ayıq olun".

DİN-in Mətbuat Xidmətindən Sonxeber.az-a bildirilib ki, bununla bağlı polis orqanlarına hər hansı məlumat daxil olmayıb. Əgər hansısa vətəndaş bu halda dələduzluğa məruz qalma riski ilə üzləşərsə və ya şübhə yaranarsa polisə, eləcə də 102 xidməti zəng mərkəzinə məlumat verməyi tövsiyyə olunur.

Telegramda izləyin

instagramda izləyin