"Azərbaycanda Dövlət Suverenliyi Günü"nün təsis edilməsi suverenliyimizin nidasıdır" - Bəhruz Quliyev

"Prezident İlham Əliyev tərəfindən imzalanan "Azərbaycanda Dövlət Suverenliyi Günü"nün təsis edilməsi haqqında Sərəncam ərazi bütövlüyümüzün və suverenliyimizin tarixi gün kimi əbədiləşdirilməsi baxımından əhəmiyyətlidir".

Bu sözləri Sonxeber.az-a açıqlamasında "Səs" qəzetinin Baş redaktoru, siyasi ekspert Bəhruz Quliyev deyib.

O, bildirib ki, Ermənistan 30 illik işğal dövründə Azərbaycanın günahsız insanlarını qətlə yetib, tarixi memarlıq nümunələrini məhv edib, yaşayış binalarını, ərazilərinin dağıdıb:

"Dünya birliyi isə Ermənistanının bu cür vandalizm aktlarına seyriçi yanaşıb. Bu ədalətsiz yanaşmanın kökündə ikili standartlar dayanırdı. Azərbaycan 44 günlük Vətən Müharibəsi ilə ikili standartları ardan qaldırdı və BMT Təhlükəsizlik Şurasının qətnamələrinin yerinə yetirilməsinə nail oldu: "2020-ci ildə Müzəffər Ordumuz Ali Baş Komandan İlham Əliyevin rəhbərliyi ilə ərazi bütövlüyünü bərpa etdi, müqəddəs Qarabağımız işğaldan azad olundu. 2023-cü ilin aprelin 23 -də isə Xankəndi-Laçın yolunun başlanğıcında, Həkəri çayının üzərində sərhəd- keçid məntəqəsi quruldu, bunla da suverenliyimiz təmin olundu. 44 günlük Vətən savaşında ermənilərin aldıqları cəzalara baxmayaraq onlar öz mənfur, xəyanətkar əməllərindən əl çəkmədilər. Vaxtaşırı olaraq separatçıların cəmləşdikləri Xankəndi istiqamətindən Şanlı ordumuza qarşı təxribatlar həyata keçirdilər".

Bəhruz Quliyev vurğulayıb ki, Ali Baş Komandan İlham Əliyev dəfələrlə ermənilərə xəbərdarlıq etsə də onlar nəticə çıxarmadılar:

"Ermənistan silahlı qüvvələri bir sıra genişmiqyaslı hərbi təxribatlar və terror hücumu törətdilər. Bu da Qəhrəman Azərbaycan ordusunun Qarabağdakı erməni terrorçularının zərərsizləşdirilməsi üçün antiterror əməliyyatlar keçirməyə sövq etdi. Beləliklə 2023-cü ilin 19 sentyabrında əməliyyatlar başladı və 23 saat 44 dəqiqə çəkən antiterror əməliyyatları ordumuzun şanlı Qələbəsi ilə başa çatdı. Separatçılar ağ bayraq qaldırıb təslim oldular. Qarabağda həyata keçirilən antiterror əməliyyatları dünya hərb tarixinin mükəmməl örnəyi olmaqla yanaşı, suverenliyimizin bərpası, həm də erməni işğalına qarşı mübarizənin nidası oldu. Eyni zamanda, bu qələbə tarixləri Xalqla Liderin birliyi, həmrəyliyi və gücünün göstəricisi oldu. Belə bir qəhrəmanlıq səlnaməsinin tarixi gün kimi qeyd olunması isə gələcək nəsillərə bir töhfədir. Bu qürürverici anları, tarixi günü Prezident İlham Əliyev imzaladığı sözügedən Sərəncamla əbədiləşdirdi. Bu tarixi gün münasibəti ilə dünya azərbaycanlılarını təbrik edirəm".

Telegramda izləyin

instagramda izləyin